හපුතලේ සහ ඉදල්ගස්හින්න අතර ප්රදේශයේදී සිදුවීමට ගිය දුම්රිය අනතුරක් වළක්වා ගැනීමට ප්රදේශයේ පදිංචිකරුවෙකුගේ අවධානය නිසා හැකියාව ලැබී තිබෙනවා.
ඊයේ රාත්රී උඩරට දුම්රිය මාර්ගයේ හපුතලේ සහ ඉදල්ගස්හින්න අතර හපුතලේ දුම්රිය ස්ථානය ආසන්නයේ දී දුම්රිය මාර්ගයට විශාල මාර ගසක් කඩා වැටී ඇති බව සඳහන්.
මේ හේතුවෙන් කොළඹ සිට බදුල්ල දක්වා ධාවනය වූ දුම්රිය පැය දෙකකට ආසන්න කාලයක් ප්රමාද වී තිබුණා.
රාත්රියේ අඳුර සහ තරමක මීදුමක් පවතින මෙම මාර්ගයේ දුම්රිය ආසන්නයටම පැමිණෙමින් තිබියදි විශාල ගසක් කඩා වැටී ඇතැයි සඳහන්.
ගස කඩා වැටීම නිසා සිදු වීමට ගිය විශාල අනතුරක් ඒ අසල සිටි නිවෙස් හිමියෙකුගේ දක්ෂතාවය නිසා නතර කර ගැනීමට හැකිවූ බවයි දුම්රියේ රියදුරන් පවසන්නේ.
එම අවස්ථාව වන විට ම්රියේ විශාල පිරිසක් ගමන් කරමින් සිටි අතර මෙම නිවෙස් හිමියා දුම්රිය ඉදිරියට පැමිණ දුම්රිය නතර කරන ලෙසට දැනුම් නොදුන්නේ නම් එය ගසේ හැපී විශාල හානියක් සිදු වීමට ඉඩ තිබූ බවයි රියදුරන් ප්රකාශ කළේ.
ගස කඩා වැටී දුම්රිය මාර්ගය අවහිර වී තිබීම නිසා ක්ෂණිකව ක්රියාත්මක වූ මෙම පුද්ගලයා මෙම අනතුරු දායක තත්ත්වය දැනුම් දීම සඳහා තම ජීවිතය පිළිබඳව ද නොතකා විදුලි පන්දමක් ද රැගෙන දුම්රිය මාර්ගයට පැමිණ දුම්රිය නවතන ලෙස සංඥා කර තිබෙනවා.
ඒ හේතුවෙන් දුම්රිය නවතා ගැනීමට හැකි වූ බවයි රියදුරන් පැවසුවේ.
සිදුවීමට ගිය විශාල දුම්රිය අනතුරක් වලක්වා ගැනීමට සහය වී ඇත්තේ වතු මුරකරුවෙකු වන එච් .එම්. විජේරත්න නම් පුද්ගලයෙක්.
මේ සම්බන්ධයෙන් අදහස් දැක්වූ දුම්රිය රියදුරු සහයකවරයා…
” ඉදල්ගස්හින්න පසු කරලා අපි කෝච්චිය ආවා. ටික දුරක් එනවිට මනුස්සයෙක් ටෝච් එකක් අරන් ඉදිරිපිටට දුවගෙන ආවා. ඒ මනුස්සයා තම ජීවිතය ගැන වත් නොසිතා තමයි ඉදිරියට දුවගෙන ආවේ. මම ඒ බව දැකලා මගේ රියදුරු මහතාට කීවා. මොකක් හරි අනතුරක් වගේ කියලා. ඒත් එක්කම රියදුරු මහතා තිරිංග ක්රියාත්මක කරලා දුම්රිය නවත්ව ගත්තා. මේ මනුස්සයා අත් දෙක උස්සගෙන කෑගහගෙන ඇවිත් ගසක් කඩා වැටී තිබීම අපට දැනුම් දුන්නා. පුංචි දුරකින් අපි කෝච්චිය නවත්වා ගත්තේ. බැරි වෙලාවත් මේ මනුස්සයා දැනුම් දුන්නේ නැත්නම් විශාල අනතුරක් සිදු වෙනවා. මේ අනතුරු වළක්වා ගැනීමට සහය වුනු ඔහුට අපි ස්තුතිවන්ත වෙනවා”
පසුව යුද හමුදා නිලධාරීන්ගේ ද සහය ඇතිව දුම්රිය මාර්ගය යථා තත්ත්වයට පත් කර ගැනීමට අවශ්ය කටයුතු කළ බවයි දුම්රිය දෙපාර්තමේන්තුව සඳහන් කලේ.
මෙම ගස කඩාවැටීම හේතුවෙන් රාත්රී කොළඹ බලා යන තැපැල් දුම්රිය ද පැය කිහිපයක් ප්රමාද වූ බව දෙපාර්තමේන්තුව ප්රකාශ කළා.
