මහනුවර ශ්රී දළඳා මාලිගය කේන්ද්ර කරගනිමින් පැවැත්වෙන ඇසළ පෙරහැර මංගල්යයේ ආරම්භක කටයුතු අද (05) සිට ආරම්භ කෙරෙනවා.
අද පෙරවරු 4.10ට නාථ, විෂ්ණු, කතරගම හා පත්තිනි යන සතර මහා දේවාලයන්හි කප් සිටුවීමේ මංගල්යය වයඹ දිශාභිමුඛ ව සිදු කෙරුණු බවයි අප ප්රාදේශීය වාර්තාකරු සඳහන් කළේ.
අලුත්නුවර ශ්රී දැඩිමුණ්ඩ දේවාල පරිශ්රයෙන් පෞරාණික ව; චාරිත්රානුකූල ව කපා ගත් ඵල නොදැරූ පණස වෘක්ෂයක කඳ කොටස(කප) අලි ඇතුන් සහිත පෙරහරකින් මහනුවර ශ්රී විෂ්ණු දේවාලය වෙත වැඩම කරවීම ඊයේ (04) සිදු කෙරුණා.
එලෙස රැගෙන ආ කප මහනුවර විෂ්ණු දේවාල පරිශ්රයේ ඇති දැඩිමුණ්ඩ දේවාලයේ තැන්පත් කරා තබා කප් සිටුවීමේ මංගල්යය සිදු කිරීම සඳහා එය කොටස් හතරකට වෙන්කර දේවාල හතරට බෙදා දීම විෂ්ණු දේවාලයේ බස්නායක නිලමේ මහේන් රත්වත්ත මහතාගේ මූලිකත්වයෙන් සිදු කෙරුණු බවයි වාර්තා වන්නේ.
කප් සිටුවීමෙන් අනතුරුව පුරා දින පහක් දේවාල අභ්යන්තර පෙරහැර පවත්වා ප්රථම කුඹල් පෙරහර අගෝස්තු මස 10 වැනි දින වීදී සංචාරය කරන බවත්; රන්දෝලි පෙරහර වීදී සංචාරය කරන්නේ අගෝස්තු මස 15 දින බවත් ශ්රී දළදා මාලිගාවේ දියවඩන නිලමේ ප්රදිප් නිලංග දෑල මහතා ප්රකාශ කළා.
අවසන් රන්දෝලි මහ පෙරහර නිකිණි පුන් පොහෝ දිනය යෙදෙන 19 වැනි දින රාත්රියේ වීදි සංචාරය කිරීමට නියමිතයි.
අවසන් රන්දෝලි මහ පෙරහර ගෙවැදීමෙන් අනතුරුව පසුුදින අලුයම සතර මහා දේවාල පෙරහර ගැටඹේ දියකපනාතොට වෙත ගොස් දියකැපීමේ මංගල්යය සිදු කරනු ඇති.
පසුව දවල් පෙරහැර අගෝස්තු 20 දින පැවැත්වීමෙන් අනතුරුව මෙවර මහනුවර ඇසළ පෙරහැර මංගල්යය නිමාවීමට නියමිතයි.
