අයි.පී.එල් තරගාවලියේ ප්‍රසාද ලකුණු සටහනේ 05 වන ස්ථානය දක්වා ඉදිරියට පැමිණීමට චෙන්නායි සුපර් කිංග්ස් කණ්ඩායම ඊයේ (23) හැකියාව ලැබුණා.
ඒ, මුම්බායි ඉන්දියන්ස් කණ්ඩායම සමඟ වන්කඩේ ක්‍රීඩාංගනයේ දී පැවති තරගය මුම්බායි කණ්ඩායම ලකුණු 103කින් පරාජය කරමින්.
මෙම තරගයේ පළමුව පන්දුවට පහර දුන් චෙන්නායි සුපර් කිංග්ස් කණ්ඩායම නියමිත පන්දුවාර 20 තුළ කඩුලු 06ක් දැවී ලකුණු 207ක් රැස් කළා.
පිළිතුරු ඉනිම ක්‍රීඩා කළ මුම්බායි ඉන්දියන්ස් කණ්ඩායම පන්දුවාර 19ක් තුළ සියල්ලන් දැවී රැස්කරගත හැකි වුයේ ලකුණු 104ක් පමණයි.
මේ අතර චෙන්නායි සුපර් කිංග්ස් කණ්ඩායම වෙනුවෙන් මෙම තරග සඳහා ක්‍රීඩා කළ වේග පන්දු යවන ක්‍රීඩක මුකේෂ් චෞද්රිට මෙම තරගය සුවිශේෂී තරගය වුණා.
දිගු කාලයක් අසනීප වී සිටි මුකේෂ් චෞද්රිගේ මව පසුගිය අඟහරුවාදා මියගිය අතර, මුකේෂ් මවගේ අවසන් කටයුතු සඳහා සහභාගී වී ඊයේ දිනයේ කණ්ඩායම සමඟ නැවත එක්ව තිබුණා.
මවගේ වියෝව නිසා දැඩි සිතවුලක් සහ පීඩාවක් තිබියදීත් සිය කණ්ඩායම වෙනුවෙන් ක්‍රීඩා කරමින් මුම්බායි ඉනිමේ අත්‍යවශ්‍ය කඩුල්ලක් වූ ක්වින්ටන් ඩි කොක්ගේ කඩුල්ල දෙවන පන්දුවාරයේ දී දවාගෙන චෙන්නායි ජයග්‍රහණය සඳහා සිය ඉහළ දායකත්වය ලබා දුන්නා.
මෙහිදී ක්වින්ටන් ඩි කොක්ගේ කඩුල්ල දවාගත් මුකේෂ් චෞද්රි සිය සුපුරුදු සැමරුම ප්‍රදර්ශනය නොකළ අතර, ඒ වෙනුවට, ඔහු නිශ්චලව සිට, අහස දෙස බලා, නිහඬ උපහාරයක් ලෙස ඉහළට ඇඟිල්ල දිගු කරමින්, “මා, යේ තෙරේ ලියේ හායි” (අම්මේ, මේ ඔබ වෙනුවෙන්) යැයි පවසන ආකාරය දැකගත හැකි වුණා.
