බුදුන් වැඳීම සඳහා මල් කැඩීමට ගිය (එවකට අවුරුදු 09ක් වයසැති) පාසල් සිසුවියකට රුපියල් 100ක් බැගින් දී එම සිසුවියව අවස්ථා කිහිපයකදීම බරපතළ ලිංගික අපයෝජනයට ලක්කිරීම සම්බන්ධව නීතිපතිවරයා විසින් ගම්පහ මහාධිකරණය හමුවේ ගොනු කර තිබූ අධි චෝදනා තුනකට වරදකරු වූ විත්තිකරුවකුට එක් චෝදනාවකට වසර 12 බැගින් වූ බරපතළ වැඩ සහිත සිරදඬුවම් ගම්පහ අංක 1 මහාධිකරණ විනිසුරු නවරත්න මාරසිංහ මහතා නියම කළේය.
එලෙස නියම කරන ලද වසර 36ක් වූ බරපතළ වැඩ සහිත සිරදඬුවම වසර 12 කින් එකවර ගෙවි යන ලෙසට නියම විය.
එම සිර දඬුවමට අමතරව චෝදනා තුනෙන් එක් චෝදනාවකට රුපියල් 25,000 බැගින් රුපියල් 75,000ක දඩයක්ද එක් චෝදනාවකට රුපියල් ලක්ෂ 2 බැගින් චෝදනා තුනට රුපියල් ලක්ෂ 6ක මුදලක් වින්දිත දැරියටද ගෙවන ලෙස විත්තිකරුට නියම විය. දඩ මුදල් නොගෙවන්නේ නම් චෝදනාවකට මාස 6 බැගින් මාස 18ක සිරදඬුවමක්ද වන්දි මුදල් නොගෙවන්නේ නම් එක් චෝදනාවකට වසරක් බැගින් වසර තුනක සිරදඬුවමක්ද විත්තිකරුට නියම කෙරිණි.
දඩ හෝ වන්දි මුදල් නොගෙවන්නේ නම් විත්තිකරුට නියම කරන ලද සිරදඬුවම් වෙන් වෙන් වශයෙන් ගෙවී යා යුතු බවටද මහාධිකරණයෙන් නියම කෙරිණි.
2013 වර්ෂයේ ඔක්තෝබර් මස පළමු වැනිදා සිට එම වර්ෂයේම ඔක්තෝබර් මස 24 වැනිදා අතර කාලය තුළදී කඩවත, ඉහළ කරගහමුණ ප්රදේශයේ පිහිටි විත්තිකරුගේ ඉඩමට මල් කැඩීමට පැමිණි එම සිසුවිය රවටා නිවෙස තුළට කැඳවාගෙන ගොස් අතවර කිරීම සම්බන්ධයෙන් එම ප්රදේශයේම පදිංචිකරුවකු වන එවකට 55 හැවිරිදි සෙල්ටන් විපුලසේන නමැති විවාහකයකුට මෙසේ දඬුවම් නියම විය.
විත්තිකරු මහාධිකරණය හමුවේ වන්දි මුදල් තැන්පත් කළ හොත් දැරියගේ නමින් බැංකු ගිණුමක් ආරම්භ කර එම වන්දි මුදල එකී බැංකු ගිණුමේ තැන්පත් කළ යුතු බවට ළමා නිවාසයේ පාලිකාවට මහාධිකරණයෙන් නියම කෙරිණි.
ළමා නිවාසයක කල්ගත කරන වින්දිත දැරිය එකී ළමා නිවාසයේ පාලිකාව විසින් එදින 28දා මහාධිකරණය හමුවට ඉදිරිපත් කර තිබූ අතර රජයේ අධිනීතිඥ ඔස්වල්ඩ් පෙරේරා මහතා පැමිණිල්ල වෙනුවෙන් පෙනී සිටියේය.
විත්තිකරු විසින් 2013 වර්ෂයේදී වින්දිත දැරියට සිදුකළ අපරාධය හේතු කරගෙන ළමා වියේ පසුවූ එම දැරියට 2013 වර්ෂයේ සිට මේ දක්වා මවුපිය, සහෝදර, සහෝදරියන් මෙන්ම ඥාතීන් සහ අසල්වැසියන් සමඟ ගත කිරීමට තිබූ ළමා කාලය ළමා නිවාසයක කාලය ගත කිරීමට සිදුවීම ඉතා අවාසනාවන්ත සිද්ධියක් බව මහාධිකරණයේදී සඳහන් විය.
විත්තිකරු සිදුකර ඇත්තේ එම දැරියගේ සහ පවුලේ උදවියගේ අහිංසකත්වය උපයෝගී කරගනිමින් රුපියල් 100ක් වැනි මුදලක් ලබාදී සමාජය ගැන හෝ ලිංගිකත්වය සම්බන්ධ කිසිදු දැනුමක් නැති දැරියකට බරපතළ අපරාධයක් සිදුකිරීම බරපතළ වරදක් බවට තීන්දුව ප්රකාශයට පත් කිරීමට පෙර මහාධිකරණ විනිසුරු නවරත්න මාරසිංහ මහතා විවෘත අධිකරණය හමුවේ පැවැසීය.
කඩවත පොලිස් ස්ථානයේ නඩු මෙහෙයුම් අංශයේ සැරයන් ජගත් (61881) නිලධාරියා පැමිණිල්ල මෙහෙයවූ රජයේ අධිනීතිඥ ඔස්වල්ඩ් පෙරේරා මහතාට සහාය දැක්වීය.
