සංවිධානාත්මක අපරාධ කල්ලි නායකයෙකු ලෙස සැලකෙන මන්නා රමේෂ් ව අද (29) අධිකරණයට රැගෙනවිත් තිබෙනවා.
මෙම සැකකරුව අත්අඩංගුවට ගැනුණේ ඩුබායි පොලිසිය විසින් වන අතර; පසුව දැඩි රැකවල් මැද ඔහු ව මෙරටට ගෙන ආවා.
රමේෂ් ප්‍රියජනක හෙවත් “මන්නා රමේෂ්” අද අවිස්සාවේල්ල මහෙස්ත්‍රාත් අධිකරණය වෙත රැගෙන ආ බවයි වාර්තා වන්නේ.
ඔහුට එරෙහිව අවිස්සාවේල්ල මහේස්ත්‍රාත් අධිකරණයේ විභාග වන නඩු කටයුත්තක් සඳහායි සැකකරුව මෙලෙස රැගෙනවිත් ඇත්තේ.
මේ වනවිට මන්නා රමේෂ්ව අපරාධ පරීක්ෂණ දෙපාර්තමේන්තුව යටතේ රඳවා තබාගෙන ප්‍රශ්න කරමින් සිටින අතර ඔහුගේ රැඳවුම් කාලය අගෝස්තු 08 වනදා අවසන් වනු ඇති.
සැකකරුගේ රැඳවුම් කාලය අවසන් වන දිනයේ දී ඔහු අධිකරණය වෙත ඉදිරිපත් කරන ලෙස නියෝග කළ බව ද අධිකරණ ආරංචි මාර්ග තහවුරු කරනවා.
ශ්‍රී ලංකා පොලීසිය කර තිබූ ඉල්ලීමකට අනුව ජාත්‍යන්තර පොලීසියේ රතු වරෙන්තු මත ඩුබායි හි දී අත්අඩංගුවට ගත් සංවිධානාත්මක අපරාධ කල්ලි නායකයෙකු ලෙස සැලකෙන මන්නා රමේෂ් මැයි 07 වනදා දිනදියි මෙරටට රැගෙන ආවේ.
අවිස්සාවේල්ල කේන්ද්‍ර කරගනිමින් ව්‍යාපාරිකයින්ගෙන් කප්පම් ගැනීම, මත්ද්‍රව්‍ය ජාවාරම සහ මනුෂ්‍ය ඝාතන සම්බන්ධයෙන් මන්නා රමේෂ්ට එරෙහි ව චෝදනා එල්ල වී තිබෙනවා.
