මන්නාරම ප්රදේශයේ යෝජිත සුළං විදුලි බලාගාරය සහ ඒ සම්බන්ධ මතු වී ඇති ගැටලු පිළිබඳ සාකච්ඡාවක් ජනාධිපති අනුර කුමාර දිසානායකගේ ප්රධානත්වයෙන් ජනාධිපති කාර්යාලයේදී ඊයේ (13) පස්වරුවේ පැවැත් වුණා.
මෙම සාකච්ඡාවේ දී රටේ බලශක්ති අවශ්යතාව සහ ආර්ථිකයට ව්යාපෘතියේ වැදගත්කම පිළිබඳව අවධානය යොමු කෙරුණා.
සුළං බලාගාරය හේතුවෙන් ප්රදේශයේ ජනතාවට ඇති වී ඇති ගැටලු පිළිබදව සොයා බලා ඒ සඳහා විසදුම් ලබාදීමට අවශ්ය ව්යුහයක් ඇති කිරීමට ද මෙහිදී තීරණය වුණා.
එමෙන්ම ටෙන්ඩර් කැඳවා කොන්ත්රාත් ප්රදානය කර, මේ වනවිට ආරම්භ කර ඇති මෙගාවොට් 20ක සහ යෝජිත මෙගාවොට් 50ක සුළං විදුලි බලාගාර දෙකෙහි ඉදිකිරීම් කටයුතු තාවකාලිකව අත්හිටුවීමට ද තීරණය කෙරුණා.
බලශක්තිය යනු ප්රදේශයේ පමණක් නොව රටේ ජාතික සම්පතක් බවත්, විදුලිය ප්රශ්නය ගෘහස්ථ විදුලි බිලට පමණක් නොව රටේ නිෂ්පාදන පිරිවැය, විදෙස් ආයෝජන සහ සමස්ත ආර්ථිකය සමඟ බැඳී පවතින බවත් ජනාධිපතිවරයා විසින් මෙම සාකච්ඡාවේදී පෙන්වා දෙනු ලැබුවා.
මෙම ව්යාපෘති මඟින් ජනතාවගේ ජීවන වෘත්තියට, ආර්ථිකයට හා ජීවිතය පවත්වාගෙන යාම සඳහා වන බලපෑම් සහ ජනතාවගේ ගැටලු පිළිබඳව සාකච්ඡා කිරීමට රජය ඕනෑම අවස්ථාවක සූදානම් බවත් ජනාධිපති අනුර කුමාර දිසානායක අවධාරණය කළා.
රටේ සියලුම සම්පත් මේ රටේ ජනතාවට අයිති බවත් බලශක්තිය යනු එක් ප්රදේශයකට සීමා වන දෙයක් නොව සමස්ත රටේම ජනතාවගේ අයිතියක් බවත් ජනාධිපතිවරයා කියා සිටියා.
සංවර්ධන ව්යාපෘති තවදුරටත් පමා කිරීමෙන් සිදුවන්නේ රටේ ආර්ථිකය ගොඩ නැගීමට තිබෙන අවස්ථාව මඟ හැරයාම බව පෙන්වා දුන් ජනාධිපතිවරයා සංවර්ධන ව්යාපෘතිවලට විරෝධතා දැක්වීම නිසා සිදුවන්නේ ආයෝජකයින්ට, කර්මාන්තකරුවන්ට සහන ලබාදීමට ආණ්ඩුවට නොහැකි වීම බවද සඳහන් කළා.
එම නිසා සංවර්ධන ව්යාපෘතිය ක්රියාත්මක කිරීමේදී සියලු පාර්ශ්ව එකඟතාවයන්ට පැමිණිය යුතු බවත් සංවර්ධන ව්යාපෘති සිදු කෙරෙන ප්රදේශයේ ජනතාවට සිදුවන බලපෑම සම්බන්ධයෙන් ඕනෑම අවස්ථාවක විසඳුම් ලබාදීමට රජය සූදානම් බවත් ජනාධිපති අනුර කුමාර දිසානායක අවධාරණය කර සිටියා.
මෙහිදී මන්නාරම ප්රදේශය නියෝජනය කරමින් පැමිණි ආගමික නායකයින් ඇතුළු ජනතාව කියා සිටියේ ඉල්මනයිට් ව්යාපෘතිය සහ සුළං බලාගාර ව්යාපෘතිය නිසා පරිසර හානි මෙන්ම ජන ජීවිතයට බලපෑම් එල්ල වන බවයි.
ඒ පිළිබඳ අවධානය යොමු කළ ජනාධිපතිවරයා මධ්යම පරිසර අධිකාරියේ ඇගයීම් වාර්තා අනුමැතියකින් තොරව එම ව්යාපෘතිය ඉදිරියට ක්රියාත්මක නොකරන බව අවධාරණය කළා.
පරිසර වාර්තා සහ නිර්දේශ නිසියාකාරයෙන් ක්රියාත්මක නොකිරීම පිළිබඳවද එම ජනතාව විසින් ජනාධිපති අනුර කුමාර දිසානායක මහතා දැනුම්වත් කළා.
මෙහිදී ජනාධිපති අනුර කුමාර දිසානායක කියා සිටියේ මන්නාරම ප්රදේශයේ ජනතාවට මුහුණ දෙන ගැටලු සොයා බැලීම සඳහා මෙම ව්යාපෘතිය මසකින් කල් දමන බවයි.
එම කාලය තුළ ගැටලු සොයා බලා ඊට කඩිනම් විසඳුම් ලබාදීමට කටයුතු කරන බවද ජනාධිපති අනුර කුමාර දිසානායක මෙහිදී කියා සිටියා.
අදානි සමාගම මඟින් විදුලි ඒකකයක් ඇමරිකානු ඩොලර් ශත 8.26 කට මිලදී ගැනීමට තිබූ අතර, එය ලංකාවේ මුදලින් රුපියල් 25කි.
නමුත් මෙම සුළං විදුලි ව්යාපෘතියේ නිෂ්පාදිත විදුලි ඒකකයේ මිල ඇමරිකානු ඩොලර් ශත 4.65ක් වන අතර, එය ශ්රී ලංකා රුපියල් 13ක් වනවා.
විදුලි ඒකකයක් නිෂ්පාදනය කිරීමේ සාමාන්ය මිල රුපියල් 13ක අවස්ථාවරයකට පවත්වාගෙන යාමට රජය සැලසුම් කර තිබෙනවා.
උතුරේ කෝකිලායි පාලම ප්රතිසංස්කරණය කිරීම සහ මන්නාරම නව ජල යෝජනා ව්යාපෘතිය සඳහා ලබන අයවැය මඟින් ප්රතිපාදන වෙන් කිරීමට කටයුතු කරන බව ද ජනාධිපතිවරයා අනාවරණය කළා.
සුළං විදුලි බලාගාරය හේතුවෙන් මන්නාරම ප්රදේශයේ ඇති විය හැකි ගංවතුර තත්ත්වයක් තිබේ නම් ඒ පිළිබඳ වාර්තාවක් සකසා දෙන ලෙස ඉඩම් ගොඩකිරීමේ දෙපාර්තමේන්තුවට උපදෙස් ලබාදී තිබෙන බව බලශක්ති අමාත්ය කුමාර ජයකොඩි මෙහිදී සඳහන් කර සිටියා.
ඉඩම් ගැටලු විසඳීම සඳහා, වනජීවී දෙපාර්තමේන්තුව, වන සංරක්ෂණ දෙපාර්තමේන්තුව, මහවැලි අධිකාරිය, ඉඩම් අමාත්යංශය සහ පරිසර අමාත්යංශය එක්ව උතුරේ ඉඩම් පිළිබඳ වාර්තාවක් සකස් කර යෝජනා ඉදිරිපත් කිරීමට නියමිතයි.
