සිය පාර්ලිමේන්තු මන්ත්රී ධුරය අහිමි කිරීමට සමගි ජන බලවේගය ගෙන තිබෙන තීරණය බල රහිත කිරීමේ නියෝගයක් නිකුත් කරන ලෙස ඉල්ලා රාජ්ය ඇමතිනී ඩයනා ගමගේ විසින් ඉදිරිපත් කළ පෙත්සමක් විභාගයට ගැනීමට ශ්රේෂ්ඨාධිකරණය දින නියම කළා.
මෙම පෙත්සම අද (02) ප්රියන්ත ජයවර්ධන, කුමුදුනි වික්රමසිංහ සහ අචල වෙංගප්පූලි යන මහත් මහත්මින්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබුවා.
එහිදී විනිසුරු මඩුල්ල නියම කළේ අදාළ පෙත්සම ජුනි මස 08 වනදා විභාගයට ගන්නා බවයි.
පෙත්සම්කාර ඩයනා ගමගේ රාජ්ය ඇමතිවරිය සඳහන් කර සිටින්නේ ආණ්ඩුක්රම ව්යවස්ථාවේ 20 වන සංශෝධනයට සහය පළ කළේ යැයි චෝදනා කරමින් වග උත්තරකරුවන් තමන්ව මන්ත්රි ධුරයෙන් නෙරපීමට කටයුතු කර ඇති බවයි.
එම තීරණයට එළඹීමට පෙර වගඋත්තරකරුවන් කිසිදු සාධාරණ විනය පරීක්ෂණයක් ලබාදීමට කටයුතු නොකළ බව පෙන්වාදෙන රාජ්ය ඇමතිවරිය මේ තුළින් ස්වභාවික යුක්ති ධර්මය නැමැති නීතිමය මූලධර්මය උල්ලංඝනය වී ඇති බවත් පෙන්වා දී තිබෙනවා.
ඒ, අනුව සිය මන්ත්රී ධුරය අහිමි කිරීමට වග උත්තරකරුවන් ගෙන තිබෙන තීරණය නීතියට පටහැනි යැයි තීන්දු කොට එය බල රහිත කිරීමේ නියෝගයක් නිකුත් කරන ලෙසත් සිය පෙත්සමෙන් වැඩිදුරටත් ඉල්ලා තිබෙනවා.
අදාළ පෙත්සමේ වගඋත්තරකරුවන් ලෙස සමගි ජනබලවේගයේ මහලේකම් රංජිත් මද්දුමබණ්ඩාර, පාර්ලිමේන්තු මහ ලේකම්වරයා මැතිවරණ කොමිසමේ සභාපතිවරයා ඇතුළු පිරිසක් නම් කර තිබෙනවා.
