ඉන්දියාවේ ඇමරිකානු තානාපති සර්ජියෝ ගෝර් ජම්මු සහ කාශ්මීරයේ ශ්රීනගර් නගරයේ නිල සංචාරයක නිරත වී එහි මහ ඇමති ඔමාර් අබ්දුල්ලා හමුවී තිබෙනවා.
පසුගිය වසර 30 තුළ ශ්රීනගර් වෙත නිල සංචාරයක් කළ පස්වැනි සේවයේ සිටින ඇමරිකානු තානාපතිවරයා ලෙස ඔහු ඉතිහාසයට එක්වෙනවා.
දකුණු සහ මධ්යම ආසියාව සඳහා ඇමරිකානු විශේෂ නියෝජිතවරයාද වන ගෝර්, ඔමාර් අබ්දුල්ලා සමඟ පැවති සාකච්ඡාවෙන් අනතුරුව “ජම්මු සහ කාශ්මීරය ඉන්දියාවේ වැදගත් කොටසක්” බව ප්රකාශ කළා.
එමෙන්ම ජම්මු සහ කාශ්මීරය සඳහා දැනට පවතින ඇමරිකානු සංචාරක අනතුරු ඇඟවීම නැවත සමාලෝචනය කරන බවද ඔහු සඳහන් කළා.
මෙම සංචාරය සිදුව ඇත්තේ ජම්මු සහ කාශ්මීරයට යළි ප්රාන්ත තත්ත්වය ලබාදෙන ලෙස ඔමාර් අබ්දුල්ලා ඉන්දීය මධ්යම රජයෙන් ඉල්ලීම් යළිත් තීව්ර කළ පසුබිමකයි.
ඉන්දීය නිදහස් දින දේශනයේදී ද ඔහු ප්රාන්ත තත්ත්වය යළි ලබාදීම සම්මේලන ක්රමය ශක්තිමත් කිරීමට අවශ්ය බව අවධාරණය කර තිබුණා.
1996 වසරෙන් පසු ශ්රීනගර් සංචාරය කළ ඇමරිකානු තානාපතිවරුන් වන්නේ ෆ්රෑන්ක් විස්නර්, රොබර්ට් බ්ලැක්විල්, ටිමොති රෝමර්, කෙනෙත් ජස්ටර් සහ දැන් සර්ජියෝ ගෝර් ය.
කෙනෙත් ජස්ටර් දෙවරක් ශ්රීනගර් සංචාරය කර ඇති අතර, 2018 අගෝස්තු මාසයෙන් පසු ස්වාධීන නිල සංචාරයක් කළ පළමු ඇමරිකානු තානාපතිවරයා වන්නේද සර්ජියෝ ගෝර් ය.
ඔමාර් අබ්දුල්ලා පවසා ඇත්තේ ජම්මු සහ කාශ්මීරයේ අභ්යන්තර දේශපාලන ගැටලු ඇමරිකානු තානාපතිවරයා සමඟ සාකච්ඡා නොකරන බවත්, එම ගැටලු විසඳිය යුත්තේ නවදිල්ලියේ මධ්යම රජය සමඟ බවයි.
