මත්ද්‍රව්‍ය වැටලීමකට ගිය පොලිසියේ මුදල් කොල්ලකෑමේ උත්සාහයක් – එක් අයෙක් අත්අඩංගුවට

මත්ද්‍රව්‍ය නාශක කාර්යාංශයේ නිලධාරීන් සතුව තිබූ රුපියල් ලක්ෂ 35කට ආසන්න මුදලක් කිඳෙල්පිටිය බදුවිල මාර්ගයේදී   කොල්ලකෑමට තැත් කළ 4 දෙනෙකුගෙන් යුත් කණ්ඩායමක එක් අයෙකු අත්අඩංගුවට ගෙන තිබෙනවා.

මුදල් කොල්ල කෑමට උත්සහ කළ අවස්ථාවේ පොලිසිය අහසට වෙඩි තබා මෙලෙස එක් පුද්ගලයෙකු අත්අඩංගුවට ගෙන ඇති බවයි අප වාර්තාකරු සඳහන් කළේ.

අත්අඩංගුවට ගත් එම සැකකරු හිටපු සිවිල් ආරක්ෂක සෙබළෙක් බව පොලිසිය සඳහන් කරනවා.

සැකකරු පැමිණි බව කියන යතුරුපැදියක් සහඑම පුද්ගලයා සතුව තිබූ මන්නා පිහියක් ද පොලිස් භාරයට ගෙන තිබෙනවා.

රුපියල් ලක්ෂ 35කට අයිස් මත්ද්‍රව්‍ය ග්‍රෑම් 250ක් අලෙවි කිරීමට ගැණුම්කරුවෙකු සොයන බවට ගාල්ල බූස්ස හමුදා නිලධාරීන්ට ලැබුණු තොරතුරක් පොලිස් මත්ද්‍රව්‍ය නාශක කාර්යාංශයේ නිලධාරීන් වෙත ලබා දීමෙන් අනතුරුව එය මිලදී ගැනීමේ මුවාවෙන් පැමිණි අවස්ථාවේ දීයි මෙය සිදුවී ඇත්තේ.

එම තොරතුරු ලබාදුන් බුද්ධි නිලධාරීන් මෝටර් රථයකින් පැමිණ ඇති අතර වැටලීම සඳහා පැමිණි මත්ද්‍රව්‍ය නාශක කාර්යාංශයේ පොලිස් නිලධාරීන් වෑන් රථයකින් පැමිණ තිබෙනවා.

මද වේලාවක දී යතුරුපැදි දෙකකින් එම ස්ථානයට පැමිණ තිබූ පුද්ගලයන් 4 දෙනෙකුගෙන් අයෙකු නිලධාරියෙක් සන්තකයේ තිබූ රුපියල් ලක්ෂ 35 කොල්ලකෑමට තැත් කර ඇති අතර ඒ සමග ක්‍රියාත්මක වූ පොලිස් නිලධාරියකු රාජකාරී ගිනි අවියෙන් අහසට වෙඩි තබා පිරිස මෙල්ල කිරීමත් සමගම තිදෙනෙකු යතුරුපැදියක නැගී පළා ගිය බවයි පොලිසිය සඳහන් කළේ.

අත්අඩංගුවට ගත් සැකකරු මත්ද්‍රව්‍ය භාවිතයට ඇබ්බැහි වූවෙකු වන අතර ඔහු වැල්මිල්ල, මෛත්‍රී මාවත ප්‍රදේශයේ පදිංචි අවුරුදු 38ක පුද්ගලයෙක්.

සැකකරු සමඟ පැමිණි අනෙක් පුද්ගලයන් හඳුනාගෙන ඇතැයි පොලිසිය සඳහන් කළා.

පොලිස් මත්ද්‍රව්‍ය නාශක කාර්යාංශය අත්අඩංගුවට ගත් සැකකරු බණ්ඩාරගම පොලිසිය වෙත භාරදී තිබෙනවා.