මත්ද්‍රව්‍ය උවදුර මුලිනුපුටා දාන්න ජනතාවගෙන් අදහස් හා යෝජනා ඉල්ලයි

රට තුළ සීග්‍ර ලෙස පැතිරෙමින් පවතින මත්ද්‍රව්‍ය උවදුර වහා පාලනය කර මුලිනුපුටා දැමීම සඳහා ක්‍රියාත්මක කළ යුතු ක්‍රමවේද සම්බන්ධයෙන් අදහස් සහ යෝජනා ලබාදීමට මහජනතාවට අවස්ථාව හිමිවී තිබෙනවා.

ඒ පසුගිය ජුනි මස 8 වැනිදා කථානායකවරයා විසින් පත් කරන ලද, රට තුළ සීග්‍ර ලෙස පැතිරෙමින් පවතින මත්ද්‍රව්‍ය උවදුර වහා පාලනය කර මුලිනුපුටා දැමීම සඳහා ක්‍රියාත්මක කලයුතු ක්‍රමවේද පිළිබඳව කරුණු සොයා බලා ඒ පිළිබඳව නිරීක්ෂණ හා නිර්දේශ පාර්ලිමේන්තුවට ඉදිරිපත් කිරීම සඳහා වන පාර්ලිමේන්තුව විශේෂ කාරක සභාව විසිනුයි.

මහජන ආරක්ෂක අමාත්‍ය ටිරාන් අලස් සභාපතිත්වය දරන මෙම විශේෂ කාරක සභාව කමිටු සාමාජික මන්ත්‍රීවරයන් 11 දෙනෙකුගෙන් සමන්විතයි.

මෙම විශේෂ කාරක සභාවේ ලේකම්වරයා ලෙස පාර්ලිමේන්තු සහකාර මහලේකම් හංස අබේරත්න මහතා කටයුතු කරනු ලබනවා.

මහ ජනතාවට යොමුකිරීමට තිබෙන අදහස් හා යෝජනා [email protected] යන විද්‍යුත් ලිපිනයට හෝ ලේකම්, පාර්ලිමේන්තු විශේෂ කාරක සභාව, ශ්‍රී ලංකා පාර්ලිමේන්තුව, ශ්‍රී ජයවර්ධනපුර ,කෝට්ටේ. යන ලිපිනයට යොමුකළ හැකියි.

ඒ අනුව මේ පිළිබඳව උනන්දුවක් දක්වන සියලු පාර්ශ්ව සහ සංවිධානවලට ඔක්තෝබර් මස 12 වනි දින හෝ ඊට ප්‍රථම අදාළ යෝජනා සහ අදහස් යොමු කළ හැකි බවයි කාරක සභාව ප්‍රකාශ කළේ.

මේ සඳහා නියෝජන ලබාදෙන අයගෙන් වාචික සාක්ෂි ලබාගැනීමට කමිටුව අදහස් කරන විට ඔවුන් අදාළ ලිපි ලේඛන ද සමග කැඳවීමට නියමිතව තිබෙනවා.