වගා කන්න 03කට පසු පළමු වරට මෙරට වී ගොවීන්ගේ වගාවට අවශ්ය මඩ පොහොර හෙවත් TSP රැගත් MV INCE PACIFIC නෞකාව අද (16) අලුයම කොළඹ වරායට පැමිණ තිබෙනවා.
එම නෞකාව මඟින් මඩ පොහොර මෙට්රික් ටොන් 36,000ක් මෙරටට රැගෙන විත් ඇති අතර, ඉදිරියේදී තවත් එවැනිම මඩ පොහොර නෞකාවක් පැමිණීමට නියමිතයි.
එක්සත් ජාතීන්ගේ ආහාර හා කෘෂිකර්ම සංවිධානයේ සහ USAID ආයතනවල දායකත්වයෙනුයි මෙම මඩ පොහොර ලබා දී ඇත්තේ.
2022/23 මහ කන්නයේ වී වගා කළ එහෙත් 2023 යල කන්නයේ වී වගා කළත් නොකළත්, මෙරට ලක්ෂ 12ක් වන සියලුම වී ගොවීන්ට මෙම මඩ පොහොර තොගය නොමිලයේ ලබා දීමට කටයුතු යොදා ඇති බවයි කෘෂිකර්ම අමාත්ය මහින්ද අමරවීර මහතා සඳහන් කළේ.
කෘෂිකර්ම දෙපාර්තමේන්තුව විසින් නිර්දේශ කර ඇති පරිදි, හෙක්ටයාර් 01කට මඩ පොහොර කිලෝග්රෑම් 55ක් බැගින් නොමිලයේ ලබා දීමට නියමිතව තිබෙනවා.
ඒ අනුව කන්න 03කට පසු සියලුම පොහොර වර්ග එකවර ලැබෙන එකම වගා කන්නය මෙම යල කන්නය යි.
ඒ අනුව TSP පොහොර (මඩ පොහොර ), යූරියා සහ MOP (බණ්ඩි පොහොර) යන රසායනික පොහොර වර්ග 03ම ගොවීන්ට ලබා දීමට කටයුතු කර ඇතැයි ද අමාත්යවරයා සඳහන් කළා.
මෙම TSP පොහොර තොගය නිල වශයෙන් භාරදීම හා ගොවීන්ට බෙදා හැරීමේ කටයුතු ලබන ඉරිදා (19) පස්වරු 01ට වත්තල කොමර්ෂල් පොහොර සමාගම් පරිශ්රයේදී සිදු කෙරෙනවා.
මෙම අවස්ථාවට අග්රාමාත්ය දිනේෂ් ගුණවර්ධන මහතා, කෘෂිකර්ම අමාත්ය මහින්ද අමරවීර මහතා, ලෝක ආහාර හා කෘෂිකර්ම සංවිධානය සහ USAID ආයතනයේ නියෝජිතයින් ද සහභාගී වීමට නියමිතයි.
