ආදරයට ජාති, කුල, මල, ආගම් භේද මෙන්ම වයස් භේදයක් නම් ඇත්තේම නැත. විශේෂයෙන් තමන් විවාහය සඳහා තෝරා ගන්නේ ප්‍රකෝටිපතියෙක් නම්, ඔය කිසිවක් අදාළ වන්නේම නැත. මේ ආදර කතා ලෝකයට අලුත්ම උදාහරණය එක් කර සිටියේ දමිළ සිනමාවේ ජනප්‍රිය නිළි මහාලක්ෂ්මි සහ චිත්‍රපට නිෂ්පාදක රවීන්ද්‍ර චන්ද්‍රසේකරන්ය. මහාලක්ෂ්මි යනු කන්නඩ සිනමාවේ ජනප්‍රිය නිළියකි. ඇය රූපවාහිනී මාලා නාටක කිහිපයකටද රංගනයෙන් දායක වී තිබේ.
එමෙන්ම රවීන්ද්‍ර චන්ද්‍රසේකරන් යනුද දමිළ සිනමාවේ දැවැන්තයෙකි. එසේම තම මුදල් සම්භාරය දමිළ සිනමාවේ ආයෝජනය කළ ධනවතෙකි. ඔහුගේ ආයෝජන ලෙස දමිළ සිනමාවට බොහෝ නව නිර්මාණ බිහි වී තිබේ. ‘මුරුන්ගායිකායි චිප්ස්‘ යනුවෙන් නම් කළ චිත්‍රපට ද්විත්වය ඒ සඳහා හොඳම උදාහරණ වේ. ඒ හැර තවත් සිනමාපට රාශියක නිෂ්පාදකවරයා වූ රවීන්ද්‍ර, ඒ හැර අධ්‍යක්ෂවරයකු මෙන්ම රංගන ශිල්පියකු ලෙසින්ද දමිළ සිනමා ක්ෂේත්‍රයට දායක වී තිබේ.
සිනමා ක්ෂේත්‍ර යේ කටයුතු අතරම මුණගැසී ඇති මේ යුවළ පසුව තම ප්‍රේම සම්බන්ධය විවාහයක් දක්වා ගෙන ඒමට කටයුතු කර තිබේ.
ඒ අනුව සැප්තැම්බර් පළමු වැනිදා තිරුපතිහිදී මේ නව යුවළ අතිනත ගෙන තිබේ. මේ විවාහය මුළු මහත් ඉන්දියාව පුරා පැතිර ගිය පුවතක් විය. මේ දෙදෙනාම මීට පෙර විවාහ වී සිටි අය වන අතර, මේ දෙදෙනාගේම දෙවැනි විවාහයන් වේ.
කෙසේ වුවද විවාහයෙන් පසු ට්විටර් පණිවිඩයක් නිකුත් කරමින් රවීන්ද්‍ර පවසා ඇත්තේ ‘ස්ථූලතාවයෙන් යුතු ජීවිතයක්‘ වෙත (තම බිරිය) ආදරයෙන් පිළිගන්නා බවයි. රවීන්ද්‍ර චන්ද්‍රසේකර් මේ වන විට 38 වැනි වියේ පසුවන අතර, ඔහුගේ බිරිය වන මහාලක්ෂ්මි 32 වැනි වියේ පසුවන්නීය. දෙදෙනා අතර සිනමා කර්මාන්තයේ සිට බොහෝ ගැළපීම් පවතින නමුත් රවීන්ද්‍ර චන්ද්‍රසේකර් යනු අධික ස්ථුලතාවයෙන් පෙළෙන අයකු වන බැවින් මේ නව යුවළ සුවිශේෂ වන බව බොහෝ පුවත්වල දක්වා තිබිණි.
එසේ වුවද තම ඉන්ස්ටර්ග්‍රෑම් ගිණුමට පණිවිඩයක් නිකුත් කරමින් මහාලක්ෂ්මි පවසා තිබුණේ තමන්ට රවීන්ද්‍ර හිමි වීම යනු තම ප්‍රේමය හිමි වීම බවයි. එමෙන්ම ඔහු හිමි වීම නිසාම තමා මහත් වාසනාවන්ත බව හැඟෙන්නේ යැයිද මහාලක්ෂ්මි එම පණිවිඩයෙහි සඳහන් කර තිබිණි.
ඒ සමඟම ඔවුන් දෙදෙනාගේ විවාහ මංගලෝත්සවයේ ඡායාරූප කිහිපයක්ද මාධ්‍ය වෙත නිකුත් කිරීමට දෙදෙනාම කටයුතු කර තිබිණි.
