මගීන් සමග ගමන් කළ ගුවන් යානයක් කඩා වැටෙයි

නේපාලයේ පොකාරා ප්‍රදේශයේ ගුවන්යානයක් කඩා වැටී තිබෙනවා.

ආසන 72ක් සහිත මෙම ගුවන් යානය අනතුරට ලක්වන අවස්ථාවන වන විට එහි මගීන් 68 දෙනෙකු පමණ ගමන් කර ඇති බවටයි වාර්තා වන්නේ.

අනතුරට හේතුවක් හෝ ඉන් සිදුවූ ජීවිත හෝ තුවාල සම්බන්ධයෙන් මෙතෙක් වාර්තා වී නැහැ.

නේපාලයේ Pokhara ජාත්‍යන්තර ගුවන් තොටුපළේ ධාවන පථය ආසන්නයේදී මෙම මගී ගුවන් යානය කඩා වැටී ඇති බවයි වාර්තා වන්නේ.

සහන කණ්ඩායම් මෙහෙයුම් ආරම්භ කර ඇති දැනට ගුවන් තොටුපළ වසා දමා ඇති බව විදෙස් පුවත් සේවා වාර්තා කළා.

අනතුරට ලක් වූ Yeti ගුවන් සේවයට අයත් ගුවන් යානයේ මගීන් 68 දෙනෙකු සහ කාර්ය මණ්ඩලයේ සිව් දෙනෙකු සිටි බව ගුවන්තොටුපල ප්‍රකාශකයෙකු සඳහන් කර තිබෙනවා.

මූලික විමර්ශන වාර්තාවලට අනුව අයහපත් කාලගුණික තත්ත්වයන් මධ්‍යයේ Pokhara ජාත්‍යන්තර ගුවන්තොටුපළට ගොඩබෑමට උත්සාහ කිරීමේදී මෙම යානය කඩා වැටී ඇති බව සඳහන්.

ගුවන් යානය ධාවන පථයට කඩා වැටීමත් සමග එය ගිනිගෙන ඇති බවයි විදෙස් වාර්තා වැඩිදුරටත් සඳහන් කළේ.

සමාජ මාධ්‍යවල පළ කරන ලද ඡායාරූප සහ වීඩියෝවල දැක්වෙන්නේ යානය කඩාවැටුණු ස්ථානයෙන් දුමාරයක් පිටවන ආකාරයයි.

ගමන් කළ මගීන් පිරිස අතර විදේශ ජාතිකයන් 10 දෙනෙකු ද සිට ඇති අතර ඔවුන් කුමන රටවල සිට පැමිණි අය ද යන්න මෙතෙක් අනාවරණ වී නැහැ.

පසුගිය 2022 වසරේ මැයි මාසයේදී, නේපාල ගුවන් සේවය වන ටාරා එයාර් සමාගමට අයත් ගුවන් යානයක් කඩා වැටීමෙන් එහි ගමන් කළ නේපාල ජාතිකයන් 16 දෙනෙක්, ඉන්දියානුවන් හතර දෙනෙක් සහ ජර්මානුවන් දෙදෙනෙක් මිය ගියා.

2018 මාර්තු මාසයේදී US-Bangla Airlines ගුවන් යානයක් කත්මණ්ඩු හි දුෂ්කර ජාත්‍යන්තර ගුවන් තොටුපළක් අසලට කඩා වැටීමෙන් පුද්ගලයන් 51 දෙනෙකුට දිවි අහිමි වුණා.

එම අනතුර 1992 වසරෙන් පසු නේපාලයේ සිදුවූ මාරාන්තිකතම අනතුර වූ අතර, පකිස්ථාන ජාත්‍යන්තර ගුවන් සේවයට අයත් ගුවන් යානයක් කත්මන්ඩු වෙත ළඟා වන විට කඩා වැටීමෙන් එහි සිටි 167 දෙනාම 1992 වසරේ මරණයට පත්වුණා.

මීට මාස දෙකකට පෙර, තායි එයාර්වේස් ගුවන් යානයක් එම ගුවන් තොටුපළ ආසන්නයේදීම කඩා වැටී 113 දෙනෙකු ද මිය ගියා.