ඇෆ්ගනිස්ථානයට බලපෑ ප්‍රබල භූ කම්පනයෙන් මියගිය සංඛ්‍යාව මේ වනවිට 2000 සීමාව ඉක්මවා ගොස් තිබෙනවා.
විදෙස් මාධ්‍ය වාර්තා කරන පරිදි මෙම භූ කම්පනය එරට ඉතිහාසයේ ඇති වූ විනාශකාරී ම භූ කම්පනය බවටයි වාර්තා වන්නේ.
මෙම භූ කම්පනය සිතුවාට වඩා විනාශකාරී මෙන් ම දරුණු ව්‍යසනයක් බවට විශ්වාස කරන බවයි ඇෆ්ගනිස්ථානයට අනතුරු අඟවමින් ජාත්‍යන්තර ආධාර කණ්ඩායම සඳහන් කරන්නේ.
ඇෆ්ගනිස්ථානය යනු දැඩි ලෙස අන්තවාදී ආගම් සහ දේශපාලනයෙන් මෙන් ම ආර්ථික අර්බුදයන්ගෙන් ද හෙම්බත් වූ රාජ්‍යයක්.
මේ වනවිට ඇෆ්ගනිස්ථානයට බලපෑ රික්ටර් මාපක 6.3ක භූ කම්පනයෙන් විපතට පත් වූවන්, තුවාල ලැබූවන් මෙන් ම දේපොළ හානිවූවන් හට සහන සැපයීමට බොහෝ ජාත්‍යන්තර සංවිධාන පොරකමින් සිටින බවයි වාර්තා වන්නේ.
විදෙස් මාධ්‍ය වාර්තා කර සිටියේ මෙය ඇෆ්ගන් ඉතිහාසයට බලපෑ තුන්වැනි විශාලත ම භූ කම්පනය බවත්, එයින් බටහිර ඇෆ්ගනිස්ථානයේ හෙරත් නගරයට විශාල වශයෙන් බලපෑම් එල්ල වී ඇති බවයි.
එම පළාතේ කිලෝමීටර් 40ක් දුරින් මෙම භූ කම්පන බලපෑම්වල හානි සිදු වුණා.
පසුගිය ජුනි මාසයේදී, ඇෆ්ගන් සහ පාකිස්ථානයට මායිම් ව පිහිටි නැගෙනහිර පක්ටිකා සහ කෝස්ට් පළාත්වලට ද භූ කම්පනයක් ඇති වූයේ රික්ටර් පරිමාණයේ 5.9ක ලෙසටයි.
එයින් ද සිවිල් වැසියන් 1000කට අධික සංඛ්‍යාවක් මියගියා.
මේ වනවිටත් ඇෆ්ගන් ගලවා ගැනීමේ මෙහෙයුම් කණ්ඩායම් විසින් සුන්බුන් අතර සිර වී සිටින පුද්ගලයින් ඉන් මුදාගැනීමේ මෙහෙයුම් ක්‍රියාත්මක කර තිබෙනවා.
ඇෆ්ගනිස්ථානයේ ජාතික අධ්‍යක්ෂ තමින්ද්‍රි ද සිල්වා සඳහන් කර සිටියේ භූ කම්පනයෙන් විනාශ වූ ගම්මානවල වැසියන් ඔවුන්ගේ ඥාතීන් ව සුන්බුන් යටින් මුදාගැනීමට උත්සාහයක නිරත වීම ඛේදනීය බවයි.
මේ වනවිට බරපතළ ගණයේ තුවාල ලැබූවන්ට ප්‍රතිකාර කිරීම සඳහා වෙන ම රෝහලක් වෙන් කර ඇති අතර, ඔවුන්ට අවශ්‍ය අත්‍යවශ්‍ය ඖෂධ, ආහාරපාන සහ ආරක්ෂාව සැපයීමට ද මේ වනවිට පියවර ගෙන තිබෙනවා.
