බෝතලයක් ඉනේ සඟවාගෙන මහමග ගමන්ගත් පුද්ගලයෙකු බෝතලයත් සමග ගල්තලාවක් මත ඇද වැටීමෙන්, බිඳී ගිය බෝතලයේ කොටසක් උදරයේ ඇනී බරපතළ තුවාල ලබා අද (30) උදෑසන මීගහකිවුල දිසා රෝහල වෙත ඇතුළත් කර තිබෙනවා.
තුවාල ලබා ඇත්තේ ඇකිරිය ගම්මානයේ පදිංචි වයස අවුරුදු 52 වයසැති පුද්ගලයෙක්.
කිසියම් අවශ්යතාවක් සඳහා මොහු වීදුරු බෝතලයක් ඉනෙහි සඟවාගෙන තවත් මිතුරෙකු සමග කැලෑබද මාර්ගයක් ඔස්සේ ගමන් ගනිමින් සිටිය දී ගමන් ගත් මාර්ගයේ තිබූ ගල්තලාවක් මත ඇද වැටී තිබෙනවා.
ඇද වැටීමත් සමඟ ඉනේ තිබූ බෝතලය පුපුරා එහි කොටසක් උදරයෙහි ඇනී මෙම අනතුර සිදුව ඇති බවයි වාර්තා වන්නේ.
ඒ අවස්ථාවේ දී වහාම ක්රියාත්මක වූ මිතුරා උදරයේ සිරව තිබූ කැඩුණු බෝතලයේ කොටස් එළියට ඇද දමා තිබෙනවා.
එහිදී අධික රුධිරය වහනය වීමත් සමගම ඔහුව රෝහලට රැගෙන විත් භාර දී ඇති අතර රෝගියා වැඩිදුර ප්රතිකාර සඳහා බදුල්ල ශික්ෂණ රෝහල වෙත මාරු කර යවා තිබුණා.
