තංගල්ල, සීනිමෝදර ප්රදේශයේ ලොරි රථ තුනක තිබී මත්ද්රව්ය සොයා ගැනීමේ සිද්ධියට අදාළව අත්අඩංගුවට ගැනුණු ‘බෙලිඅත්තේ සනා’ නොහොත් වීරසිංගේ සනත් නැමැත්තා ලබන 09 වනදා දක්වා රඳවාගෙන ප්රශ්න කිරීමට අධිකරණය අවසර ලබා දී තිබෙනවා.
සැකකාර වීරසිංගේ සනත් නැමැත්තා අද (03) දින තංගල්ල අධිකරණයට ඉදිරිපත් කිරීමෙන් අනතුරුව වැඩබලන මහේස්ත්රාත් විදුර වීරකෝන් මහතා තංගල්ල පොලීසියට මෙම අවසරය ලබා දුන්නා.
තංගල්ල කොට්ඨාශ අපරාධ විමර්ශන ඒකකය මඟින් මෙම සැකකරු පෙරේදා (01) දිනයේ අත්අඩංගුවට ගනු ලැබුවා.
මොහු මෙම ජාවාරමට සම්බන්ධ ප්රධාන සැකකරුවෙකු වන ‘භූමිතෙලා’ නමැත්තාගේ සමීපතමයෙකු බවයි පොලීසිය සඳහන් කළේ.
විදෙස් රටක සිට මෙරටට රැගෙන විත් ප්රවාහනය කිරීම සඳහා සූදානම් කර තිබූ අයිස් සහ හෙරොයින් මත්ද්රව්ය කිලෝග්රෑම් 700කට අධික ප්රමාණයක් ලොරි රථ තුනක තිබී තංගල්ල සීනිමෝදර ප්රදේශයේ දී පසුගියදා පොලීසිය විසින් සොයා ගත්තා.
‘උනාකුරුවේ ශාන්ත’ නැමැති විදෙස්ගත මත්ද්රව්ය ජාවාරම්කරුවෙකුට අයත් බව කියන අදාළ මත්ද්රව්ය තොගය මෙරට ජාවාරම් කටයුතුවල නිරත වූ සැකකරුවන් අත්අඩංගුවට ගැනීම සඳහා පොලීසිය විසින් විශේෂ මෙහෙයුමක් මේ වන විට ආරම්භකර තිබෙනවා.
