නිරිතදිග බෙංගාල බොක්ක ප්‍රදේශය ආශ්‍රිත පැවති පීඩන අවපාතය අද උදෑසන වන විට ගැඹුරු පීඩන අවපාතයක් බවට පත්ව ඇති බව කාලගුණ විද්‍යා දෙපාර්තමේන්තුව පවසනවා.
එය උතුරු අක්ෂාංශ 10.5 සහ නැගෙනහිර දේශාංශ 84.1 ආසන්න ප්‍රදේශයේ ත්‍රිකුණාමලයේ සිට කිලෝමීටර් 380ක් පමණ ඊසාන දෙසින් පවතින බවයි එම දෙපාර්තමේන්තුව සඳහන් කළේ.
එය හෙට (03) වන විට සුළි කුණාටුවක් දක්වා තවදුරටත් වර්ධනය වනු ඇති බවට අනාවැකි පළ කෙරෙනවා.
මෙම පද්ධතිය ශ්‍රී ලංකාවේ උතුරු වෙරළට ආසන්නයෙන් බටහිරට බරව වයඹ දෙසට ගමන් කර 04 වන දින වන විට ඉන්දියාවේ උතුරු තමිල්නාඩු වෙරළ තීරය දක්වා ගමන් කිරීමෙන් පසු උතුරු දෙසට ගමන් කර 5 වනදා වන විට දකුණු අන්ද්‍රා ප්‍රදේශයේ වෙරළ තීරයෙන් ගොඩබිමට ඇතුලු වනු ඇති බවටයි බලාපොරොත්තු වන්නේ.
මෙම පද්ධතියේ බලපෑම හමුවේ දිවයිනේ බොහෝ ප්‍රදේශවල අහස වළාකුලින් බරවී පවතිනු ඇති.
උතුර, උතුරු මැද, නැගෙනහිර සහ ඌව පළාත්වල විටින් විට වැසි හෝ ගිගුරුම් සහිත වැසි ඇතිවිය හැකියි.
උතුර, උතුරු මැද සහ නැගෙනහිර පළාත්වල ඇතැම් ස්ථානවලට මිලිමීටර් 100ට වැඩි තද වැසි ද ඇතිවීමේ හැකියාවක් පවතිනවා.
දිවයිනේ සෙසු පළාත්වල තැනින් තැන වැසි හෝ ගිගුරුම් සහිත වැසි ඇතිවිය හැකි බවයි කාලගුණ විද්‍යා දෙපාර්තමේන්තුව සඳහන් කළේ.
උතුර, උතුරු මැද, වයඹ සහ දකුණු පළාත්වලත් ත්‍රිකුණාමලය සහ මඩකලපුව දිස්ත්‍රික්වලත් විටින් විට හමන පැයට කිලෝමීටර් 40ක 50ක පමණ තද සුළං ද බලාපොරොත්තු වනවා.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසටයි ජනතාවගෙන් ඉල්ලීමක් කෙරෙන්නේ.
