බුලත්සිංහල, ඈගල්ල පාර ප්රදේශයේ පිහිටි රෙදිපිළි අලෙවිසැලක් තුළ තිබී අඹුසැමි යුවළකගේ මළ සිරුරු දෙකක් ඊයේ (14) සොයාගෙන තිබෙනවා.
බුලත්සිංහල පොලීසියට ලද තොරතුරක් මත වහාම ක්රියාත්මක වූ නිලධාරීන් කණ්ඩායමක් එම ස්ථානයට ගොස් සිදුකළ මූලික විමර්ශනවලදී මෙම මෘත ශරීර සොයාගෙන ඇති බවයි වාර්තා වුණේ.
මෙලෙස අභිරහස් ලෙස මියගොස් ඇත්තේ 55 හැවිරිදි කාන්තාවක් සහ ඇයගේ 61 හැවිරිදි සැමියායි.
මෙම යුවළ 2018 වසරේ සිට මෙම කඩ කාමරය කුලියට ගෙන පදිංචිව සිට ඇති අතර, පිරිමි පුද්ගලයා පෞද්ගලික ආයතනයක ආරක්ෂක නිලධාරියකු ලෙස රැකියාව කර තිබූ බවට තොරතුරු හෙළිව තිබෙනවා.
මියගිය කාන්තාව එම ගොඩනැගිල්ලේ බිම් මහලේ රෙදි කඩයක් පවත්වාගෙන ගොස් ඇති අතර, දින කිහිපයක සිට මෙම දෙදෙනා අතර අරවුල් ඇති කරගෙන තිබූ බවටයි මූලික විමර්ශනවලදී අනාවරණය වී ඇත්තේ.
දින කීපයක සිට මෙම නිවසේ විදුලි බුබුලු දැල්වෙමින් පැවති අතර දොර ඇතුළෙන් අගුළු දමා වසා තිබූ බවට හෙළිවුණා.
එහි සිටි යුවළ ද පෙනෙන්නට නොසිටීම හේතුවෙන් අවට පිරිස් විසින් බුලත්සිංහල පොලිස්ථානයට මේ පිළිබඳව දැනුම් දී ඇති අතර, ඒ අනුව ඊයේ රාත්රි 8.00 ට පමණ ක්රියාත්මක වූ පොලිස් නිලධාරීන් කණ්ඩායමක් එම ස්ථානයට ගොස් දොර කඩා ඇතුළු වී බැලීමේදී කාමරයේ බිම වැටී තිබූ මෙම සිරුරු දෙක සොයාගෙන තිබෙනවා.
මරණයට හේතුව මෙතෙක් අනාවරණය වී නොමැති අතර, මෙය ඝාතනයක්ද නැතහොත් වෙනත් හේතුවක් මත සිදුවූවක්ද යන්න සෙවීම සඳහා පුළුල් විමර්ශනයක් ආරම්භ කර තිබෙනවා.
