බුදු හිමියන්ගේ පුනරුප්පත්තිය බව කියූ අයෙක් අපයෝජන චෝදනා මත අත්අඩංගුවට

අනුගාමිකයන් විසින් බුදු හිමියන්ගේ පුනරුත්පත්තියක් යැයි විශ්වාස කරන අධ්‍යාත්මික නායකයෙකු වන Ram Bahadur Bomjon පොලිස් අත්අඩංගුවට ගෙන තිබෙනවා.

නේපාල පොලිසියේ මධ්‍යම විමර්ශන කාර්යාංශය (CIB) පැවසුවේ 33 හැවිරිදි Ram Bahadur Bomjon සැඟවී සිටි කත්මන්ඩු නගරයට ආසන්නයේ පිහිටි නිවසකින් අත්අඩංගුවට ගත් බවයි.

ඔහුගේ ආශ්‍රමවලදී විවිධ පුද්ගලයන්ගේ අතුරුදන්වීම්වලට සහ ස්ත්‍රී දූෂණ චෝදනා සම්බන්ධයෙන් අත්අඩංගුවට ගෙන ඇති බවයි නේපාල පොලිසිය ප්‍රකාශ කළේ.

බැතිමතුන් අතර “බුද්ධ බෝයි” (“Buddha Boy”) ලෙස හැඳින්වෙන රාම් බහදූර් බොම්ජන් යෞවනයෙකු ලෙස ප්‍රසිද්ධියට පත් වූයේ ඔහුට ජලය, ආහාර හෝ නින්ද නොමැතිව මාස ගණනක් නොසෙල්වී භාවනා කළ හැකි බව අනුගාමිකයින් පැවසීමෙන් පසුවයි.

මෙම පුද්ගලයාට භක්තිවන්ත අනුගාමිකයන් ද සිටින අතර එම අනුගාමිකයන්ට ශාරීරිකව හා ලිංගිකව හිරිහැර කළ බවට දිගු කලක් තිස්සේ චෝදනා එල්ල වීමෙන් අනතුරුව වසර ගණනාවක් බලධාරීන්ගෙන් සැඟවී සිටියා.

නේපාල අගනුවරට දකුණින් පිහිටි දිස්ත්‍රික්කයක් වන සර්ලාහි ආශ්‍රමයකදී බාලවයස්කාර දැරියක් දූෂණය කිරීම සම්බන්ධයෙන් නිකුත් කරන ලද වරෙන්තුවක් මතයි බොම්ජන් කත්මණ්ඩු නුවරදී මෙලෙස පොලිසිය විසින් අත්අඩංගුවට ගෙන ඇත්තේ.

ඒ නේපාල රුපියල් මිලියන 30ක් (ඩොලර් 225,000)ක් සහ තවත් ඩොලර් 22,500ක විදේශ මුදල් තොගයක් සමඟින්.

2010 දී Bomjan ට එරෙහිව පහරදීම් පැමිණිලි රැසක් පොලිසියට ලැබුණු අතර තමාගේ භාවනාවට බාධා කළ නිසා තමා වින්දිතයින්ට පහර දුන් බවයි ඔහු ප්‍රකාශ කර තිබුණේ.

2018 වසරේදී 18 හැවිරිදි කන්‍යා සොහොයුරියක් ආරාමයක දී තමාව දූෂණය කළ බවට මෙම පුද්ගලයාට චෝදනා කළා.

ඔහුගේ එක් ආශ්‍රමයකින් බැතිමතුන් හතර දෙනෙකු අතුරුදහන් වූ බව පවුලේ සාමාජිකයන් විසින් වාර්තා කිරීමෙන් පසු ඊළඟ වසරේ පොලිසිය ඔහුට එරෙහිව තවත් පරීක්ෂණයක් ආරම්භ කර තිබුණා.

ඔවුන් සිව්දෙනා සිටින්නේ කොහේදැයි තවමත් නොදන්නා බවයි මධ්‍යම විමර්ශන කාර්යාංශය සඳහන් කර ඇත්තේ.

එක් අවස්ථාවකදී දස දහස් ගණන් ජනයා කැලයේ ගැඹුරින් භාවනාවේ යෙදී සිටි ඔහුගේ හාස්කම් දැකීමට රැස්ව සිටියා.