අහමදාබාද් ගුවන් අනතුරට මුහුණ දුන් බීජේ වෛද්‍ය විද්‍යාලයේ ශිෂ්‍ය නේවාසිකාගාරයේ සිසුන් ඇතුළු 60 දෙනෙකු අතුරුදන් බව ඉන්දීය මාධ්‍ය වාර්තා කරනවා.
ඊයේ (12) දහවල් ලන්ඩනය බලා පියාසැරි ඇරඹූ එයාර් ඉන්දියන් ගුවන් යානය ගුවන්ගත වී මිනිත්තු කිහිපයක් යන්නටත් පෙර අසල තිබූ වෛද්‍ය විද්‍යාලයීය ශිෂ්‍ය නේවාසිකාගාරයට කඩා වැටී වෛද්‍ය සිසුන් සිව්දෙනෙකු සහ පශ්චාත් වෛද්‍ය උපාධිය අපේක්ෂාවෙන් සිටි වෛද්‍යවරයෙකු ද ජීවිතක්ෂයට පත් වුණා.
කෙසේ වෙතත් වෛද්‍ය විද්‍යාලයීය ආරංචි මාර්ග සඳහන් කළේ ගුවන් අනතුර සිදු වන අවස්ථාවේ දී ශිෂ්‍ය නේවාසිකාගාරයේ පිරිමි සිසුන් 100කට ආසන්න ප්‍රමාණයක් දිවා ආහාරය ගනිමින් සිටි බවයි.
මේ වනවිට වෛද්‍ය විද්‍යාලයේ නේවාසිකාගාර පරිශ්‍රයට මෙහෙයුම් කණ්ඩායම් පැමිණ මියගිය අයගේ සිරුරු ඥාතීන්ට භාරදීම සඳහා DNA සාම්පල එකතු කිරීමේ ස්ථානයක් ලෙස ද ක්‍රියාත්මක වී තිබෙනවා.
සමස්ත ඉන්දීය වෛද්‍ය සංගම් සම්මේලනය (FAIMA) පැවසුවේ අවම වශයෙන් MBBS සිසුන් පස් දෙනෙකු, PG නේවාසික වෛද්‍යවරයෙකු සහ වෛද්‍ය විද්‍යාලයේ සුපිරි විශේෂඥ වෛද්‍යවරයෙකුගේ බිරිඳ මියගොස් ඇති අතර තුවාලකරුවන් රෝහල්ගත ව ප්‍රතිකාර ලබන බවයි.
මෙම ගලවා ගැනීමේ මෙහෙයුම් කටයුතුවලට සම්බන්ධ වූ MBBS ශිෂ්‍යයෙකු වන ශ්‍යාම් ගෝවිල් පැවසුවේ, “මළසිරුරු එකක්වත් හඳුනාගැනීමට නොහැකි වී ඇති බවයි.
ගුවන් යානය කඩා වැටීමෙන් ඒ අසල ගම්මානයේ වැසියන් 50 දෙනෙකු පමණ ද පිළිස්සුම් තුවාල ලබා අහමදාබාද් සිවිල් රෝහලට ඇතුළත් කර ඇති බවත් ඔවුන්ගේ තත්ත්වය බරපතළ නමුත් ස්ථාවර සෞඛ්‍ය මට්ටමක සිටින බවත් වෛද්‍ය අංශ නිවේදනය කරනවා.
