බිස්කට්, අයිස් ක්‍රීම්, චොක්ලට් ඇතුළු රස කැවිලි නිෂ්පාදන මිල ලබන මැයි මාසය දක්වා වැඩි නොකරන බවට ලංකා රස කැවිලි හිමියන්ගේ සංගමය විසින් සහතක වී තිබෙනවා.
වෙළෙඳ අමාත්‍ය අමාත්‍ය වසන්ත සමරසිංහ සමඟ ඊයේ (26) පැවති සාකච්ඡාවකදී ඔවුන් මේ බව සඳහන් කර තිබෙනවා.
මැද පෙරදිග කලාපීය යුධ ගැටුම් හමුවේ වර්තමානයේ රටේ උද්ගතව ඇති තත්ත්වය තුළ බිස්කට් ඇතුළු රස කැවිලි නිෂ්පාදන කර්මාන්තයට ඇති කර තිබෙන බලපෑම් සහ එය කළමනාකරණයට එම කර්මාන්තකරුවන් ගන්නා තීරණ පාරිභෝගිකයාට බලපාන ආකාරය සම්බන්ධයෙන් සාකච්ජා කිරීමට වෙළෙඳ අමාත්‍යවරයා විසින් මෙම හමුව කැඳවා තිබුණා.
පාරිභෝජන භාණ්ඩ මිල ඉහළ යාම මේ මොහොතේ පාරිභෝගිකයාට දරා ගත නොහැකි බව අමාත්‍යවරයා මෙහිදී පෙන්වා දෙනු ලැබුවා.
ගෝලීය තත්ත්වය විසින් ඇති කර තිබෙන බලපෑම තුළ මෙරට බිස්කට් කර්මාන්තයේ නිරත පිරිස් රැකගනිමින්, පාරිභෝගිකයා ද පීඩාවට පත්වීම අවම වන ලෙස කළමනාකරණය කරගැනීම රජයේ අපේක්ෂාව බව වෙළෙඳ අමාත්‍ය වසන්ත සමරසිංහ පැවසුවා.
මෙම අසීරු අවස්ථාවේ කර්මාන්තකරුවන් මුහුණ දෙන ගැටලු විසඳාදීමට රජය මැදිහත්වීමට සූදානම් බවත්, දුෂ්කරතා මධ්‍යයේ වුව ද පාරිභෝගිකයා ගැන සිතා කටයුතු කරන්නැයි අමාත්‍යවරයා සදහන් කළා.
මේ අතර මැයි මාසයෙන් පසුව පමණ තවදුරටත් ගෑස් මිල, විදුලි බිල සහ අමුද්‍රව්‍ය මිල ඉහළ ගියහොත් පමණක් යම් මිල සංශෝධනයකට යොමුවන බව ලංකා රස කැවිලි හිමිකරුවන්ගේ සංගමයේ සභාපති එස්.එම්.ඩී. සූරියකුමාර මෙහිදී පැවසුවා.
අමුද්‍රව්‍ය රේගුවෙන් නිදහස් කර ගැනීමේදී විශාල ප්‍රමාදයක් සිදුවන බවත්, දැනටමත් නැව්ගතකිරීම් ගාස්තු ලෙස අතිරේක ගාස්‍තුවක් අයකරන බවට දැනුම් දී ඇති බවත් ලංකා රස කැවිලි හිමිකරුවන්ගේ සංගමය පෙන්වා දුන්නා.
කෙසේවෙතත් මැයි මාසය දක්වාම මෙම මිල ගණන් පවත්වා ගෙන යන බවත්, අවුරුදු සමයේ සිදුකරන නිෂ්පාදන බෙදා හැරීම් සදහා ප්‍රමාණවත් ඉන්ධන සැපයීමට සුදුසු ක්‍රමවේදයක් සකසා දෙන ලෙසත් දැනට හඳුන්වා දී ඇති ක්‍රමවේදයේ ඇති ගැටලු විසඳා දෙන ලෙසත් ඔවුන් මෙහිදී ඉල්ලීමක් කළා.
