රත්මලාන, ගොළුමඩම ප්රදේශයේ දී බිරිඳ හා පුතුන් දෙදෙනා නිදන කාමරය තුළ දී නිදි යහනට ගිනි තබා ඝාතනය කිරිමේ චෝදනා තුනකට වරදකරු වූ විත්තිකරුට කොළඹ මහාධිකරණය නියම කළ මරණ දඬුවම ස්ථිර කරමින් අභියාචනාධිකරණය නියෝගයක් නිකුත් කර තිබෙනවා.
මහාධිකරණ විනිසුරු විකුම් ඒ.කලුආරච්චි මහතා 2019 නොවැම්බර් 07 වැනිදා නියම කළ එකී මරණ දඬුවම අභියෝගයට ලක්කරමින් මධුර මනුරංග ද සිල්වා නැමති විත්තිකරු විසින් ගොනු කළ අභියාචනා පෙත්සම ද එහිදි ප්රතික්ෂේප කළ අභියාචනාධිකරණ විනිසුරු සම්පත් බී අබේකොන් මහතා, පී. කුමාරරත්නම් යන මහත්වරු විසින් එම නියෝගය නිකුත් කරනු ලැබුවා.
මහාධිකරණ විසින් එම තින්දුව ලබා දි ඇත්තේ ඉදිරිපත් වූ සියලුම සාක්ෂි මැනවින් සලකා බලා හා එම අමානුෂික ඝාතනය සිදුකොට ඇත්තේ විත්තිකරු චේතනාන්විත අරමුණින් බව සාධාරණ සැකයෙන් ඔබ්බට තහවුරු කර ගැනීමෙන් පසුව බව විනිසුරු මඩුල්ල පෙන්වා දුන්නා.
පිටු 38කින් යුතුව විනිසුරු මඩුල්ලේ එකඟතාවය මත නිකුත් කළ එම නියෝගයේ වැඩිදුරටත් සඳහන් කර ඇත්තේ මහාධිකරණ නියෝගය ප්රතික්ෂේප කර විත්තිකරුගේ ඉල්ලිමට ඉඩදීමට තරම් කිසිඳු සාධාරණ හේතුවක් තම අධිකරණයට නොමැති බවයි.
2012 දෙසැම්බර් 16 වනදා රත්මලාන, ගොළුමඩම ප්රදේශයේ දී මධුර මනුරංග නැමැත්තා විසින් වෙනත් තරුණියක් විවාහ කරගැනිමේ චේතනාවෙන් සිය බිරිඳ වු අවුරුදු 29ක සඳමාලි ප්රනාන්දු , වයස අවුරුදු තුනක් හා මසක් වයසැති දරුවන් දෙදෙනා නිදියහනට ගිනි තබා ඝාතනය කර තිබුණා.
එහිදී නීතිපතිවරයා විසින් පවරා තිබූ නඩුවේ දී එවකට නියෝජ්ය සොලිසිටර් ජනරාල්වරයකු වූ දිලිප පීරිස් මහතාගේ මෙහෙයවීම මත සාක්ෂිකරුවන් 14 දෙනකු සාක්ෂි ලබා දී තිබුණා.
රජයේ අධිනීතිඥ මලික් අසිස් මහතා සමඟ නියෝජ්ය සොලිසිටර් ජනරාල් ජනාධිපති නිතිඥ අසේකා වීරසේන මෙනවිය නීතිපතිවරයා වෙනුවෙන් අභියාචනාධිකරණය හමුවේ පෙනී සිටියා.
මධුර මනුරංග ද සිල්වා ලංකාවෙ ඉන්නවද, නැතිනම් රට ගිහිල්ලද?
නැතිනම් ඇප මත මුදා හැරලද ඉන්නෙ? මම දන්නෙ නැති නිසා අහන්නෙ, ඇපෑලක් විභාග කරන්න අවුරුදු පහක් යනව කියන්නෙ ටිකක් අවුල් වගේ නැද්ද. චූදිත රට පැනල එහෙම නම් වින්දිතයන්ට කිසිදු සාධාරනයක් වෙන්නෙ නැහෑ වගේ නේද.