බිරිඳ සහ දියණියන් විසින් පහර දී අත් පා ගැටගසා සිරකර සිටි පොලිස් නිලධාරියෙක් ආරච්චිකට්ටුව පොලීසියේ නිලධාරීන් විසින් මුදාගෙන ප්‍රතිකාර සදහා හලාවත මහා රෝහලට ඇතුළත් කර තිබෙනවා.
මෙලෙස රෝහල් ගතකර ඇත්තේ කුරුඳුවත්ත පොලීසියේ අනියුක්තව සේවය කරමින් සිටි කොස්තාපල්වරයෙක්.
ඔහු රාජකදළුව – මානාවේරිය ප්‍රදේශයේ පදිංචිකරුවෙක් වන අතර, මොහු මත්පැන් පානය කර නිවසට පැමිණ තම බිරිඳට සහ දියණියන් දෙදෙනාට මෝල ගසකින් පහර දී ඇති බවයි අනාවරණය වී ඇත්තේ.
අනතුරුව බිරිඳ සහ දියණියන් දෙදෙනා එක්ව ඔහුට පහර දී අත පය ගැටගසා සිරකර ආරච්චිකට්ටුව පොලීසිය දැනුම්දීමට කටයුතු කර තිබෙනවා.
පසුව පොලීසිය පැමිණ පොලිස් කොස්තාපල්වරයා ඉන් මුදවාගෙන ඇති අතර, බිරිඳ සහ දරුවන්ට පහර දීමේ සිද්ධියට අත්අඩංගුවට ගෙන ඇති බවයි වාර්තා වුණේ.
ඉන් අනතුරුවයි ප්‍රතිකාර සඳහා ඔහුව රෝහල් ගතකර ඇත්තේ.
පොලිස් කොස්තාපල්වරයාගේ බිරිඳ ද ප්‍රතිකාර සදහා හලාවත මහ රෝහලට ඇතුළත් කර ඇති අතර, සැකකාර කොස්තාපල්වරයා පසුගිය ජූලි මස 21 වෙනිදා සිට සේවයට වාර්තා කර නොමැති බවට ද තොරතරු අනාවරණය වී තිබෙනවා.
