බාල වයස්කාර පාසල් සිසුවෙකු පැදවූ වෑන් රථයක සිය යතුරුපැදිය මුහුණට මුහුණ ගැටීමෙන් සිදු වූ රිය අනතුරකින් දෙදරු පියෙක් ජීවිතක්ෂයට පත් ව තිබෙනවා.
මෙම අවාසනාවන්ත සිදුවීම වාර්තා වන්නේ ඊයේ (01) පස්වරුවේ හලාවත – ඉරණවිල මාර්ගයේ මැදවත්ත ප්රදේශයෙන්.
බරපතළ තුවාල ලැබූ මරණකරු හලාවත රෝහලට කඩිනමින් ඇතුළත් කෙරුණ ද ඒ වනවිටත් ජීවිතක්ෂයට පත් ව ඇති බවයි පොලිසිය පැවසුවේ.
මෙලෙස මියගොස් ඇත්තේ මැදවත්ත ප්රදේශයේ පදිංචි ව සිටි 32 හැවිරිදි නුවන් සංජීව ප්රනාන්දු නමැත්තෙක්.
අනතුරට සම්බන්ධ වෑන් රථය පදවා ඇත්තේ වයස අවුරුදු 15ක් වන පාසල් සිසුවෙකු බව විමර්ශනවල දී හෙළි ව තිබෙනවා.
ඔහු හලාවත – මයික්කුලම ප්රදේශයේ පදිංචිකරුවෙක්.
සිද්ධිය සම්බන්ධයෙන් සැකකාර බාල වයස්කාර සිසුවා පොලිස් අත්අඩංගුවට ගෙන තිබෙනවා.
