පිළියන්දල ප්‍රධාන බස් නැවතුම්පොලේ වේලා සටහන් කරුවෙකුට පහරදීමේ සිදුවීමට එරෙහිවෙමින් ආරම්භ කිරීමට සැලසුම් කළ බස් වර්ජනය පොලිසියේ මැදිහත්වීමෙන් අත්හිටුවීමට සමත් ව තිබෙනවා.
පහරකෑමට ලක්වූ පානදුර මාලමුල්ල පදිංචි වේලා සටහන්කරු ප්‍රතිකාර සඳහා පිළියන්දල දිසා රෝහල වෙත ඇතුළත් කර ඇති බවයි අප වාර්තාකරු සඳහන් කළේ.
මාර්ග අංක 162, පිළියන්දල- බණ්ඩාරගම ප්‍රධාන මාර්ගයේ ධාවනය වන කැස්බෑව ඩිපෝවට අයත් බස් රථයක රියදුරෙකු සම්මත ක්‍රමයට පටහැනිව බස් රථය නැවතුම්පොළේ ගමන් ආරම්භ කිරීම සඳහා ගාල් කර තිබෙනවා.
එම අවස්ථාවේ වේලා සටහන්කරු සිය විරෝධය පළ කර බස් රථය ඉවත් කර ගන්නා ලෙස පැවසීමත් සමගම මෙම පහරදීම සිදු කර ඇති බවයි පොලිසිය ප්‍රකාශ කළේ.
මෙම සිදුවීමත් සමඟ පිළියන්දල ප්‍රධාන බස්නැවතුමෙන් ආරම්භ වන කෙටි දුර මාර්ග සහ අතුරු මාර්ග වලට අයත් බස් රථවල රියදුරන් සහ කොන්දොස්තර වරුන් බස් රථ ධාවනය නවතා වර්ජනය කිරීමට සූදානම් වන බවට පිළියන්දල පොලිසිය ලද තොරතුරක් අනුව ක්‍රියාත්මක වීමෙන් වර්ජනය අත්හිටුවීමට කටයුතු කර තිබෙනවා.
වර්ජනයට සුදානම් වූ බස් රථ රියදුරන් සහ කොන්දොස්තරවරුන් හමු වූ රථවාහන අංශයේ ස්ථානාධිපති, පහර දුන් බව කියන රියදුරු සහ කොන්දොස්තරවරයා ඉතා ඉක්මනින් අත්අඩංගුවට ගන්නා බවට ලබාදුන් පොරොන්දුවක් අනුවයි වර්ජනය අතහැර දැමීමට රියදුරන් සහ කොන්දොස්තරවරුන් එකඟතාවය පළ කර ඇත්තේ.
සිද්ධිය සම්බන්ධයෙන් වැඩිදුර පරීක්ෂණ පිළියන්දල පොලිසිය විසින් සිදු කරනවා.
