කෙටි දුර ධාවනයවන බස් රථවලින් රුපියල් එක්දාස් පන්සීයක සහ අනෙකුත් බස්රථවලින් රුපියල් දෙදාහක දෛනික පාඩුවක් විඳීමට සිදුව ඇති බව ඒකාබද්ධ බස් හිමියන්ගේ සංගමය පවසනවා.
එම සංගමය අද (30) කැඳවා තිබූ මාධ්ය හමුවක දී මේ බව සඳහන් කළා.
එහිදී ඔවුන් වැඩිදුරටත් සඳහන් කළේ මීළඟ ඉන්ධන මිල සංශෝධනයේ දී අනිවාර්යෙන්ම බස් ගාස්තු වැඩිවීමක් සිදුවිය යුතු බවයි.
ඉන්ධන මිල වැඩිවන දින මධ්යම රාත්රියේ සිටම බස් ගාස්තු ද සංශෝධනය විය යුතු බව මෙහිදී සඳහන් කළ සමස්ත ලංකා බස් හිමියන්ගේ සංගමයේ ප්රධාන ලේකම් අංජන ප්රියන්ත එසේ නොවුනහොත් එදින සිට බස් ධාවනයෙන් වැළකී සිටින බවයි සඳහන් කර සිටියේ.
ඉන්ධන මිල අඩු වුවහොත් විශාල ප්රතිශතයකින් බස් ගාස්තු ද පහත දැමීමට පෞද්ගලික බස් හිමියන් සූදානම් බව ද ඔහු වැඩිදුරටත් පැවසුවා.
මේ අතර මගීන් ප්රවාහනය කරන බස් රථ සඳහා QR කේතය යොදාගෙන ඉන්ධන සහනාධාරයක් ලබාදෙන ලෙසට ද මෙහිදී රජයට යෝජනාවක් ද ගෙන එනු ලැබුවා.
