බලංගොඩ නගරයේ ඇති ඉන්ධන පිරවුම්හලෙන් නිකුත් කළ ඩීසල් ලබාගත් බස් සහ ලොරි රථ කිහිපයක් ඊයේ රාත්‍රියේ අතරමග නතර වී තිබුණා.
මෙලෙස නැවතුණු බස් සහ ලොරි රථ පරීක්ෂා කිරීමේදී අනාවරණය වී තිබුණේ පිරවුම්හලෙන් නිකුත් කළ ඩීසල් වලට විශාල වශයෙන් ජලය මිශ්‍ර වී ඇති බවයි.
බලංගොඩ සමූපකාර සමිතිය යටතේ කලමණාකරනය වන අදාළ ඉන්ධන පිරවුම්හලේ ඉන්ධනවල ප්‍රමිතිය පරීක්ෂා කිරීමට අයි. ඔි.සි. සමාගමෙි නිළධාරින් ඊයේ (13)දින රාත්‍රියේ කටයුතු කළා.
එහිදී ඩීසල් ටැංකියට ජලය මිශ්‍රකර ඇති බවට සොයාගෙන ඇති අතර, චෝදනා හේතුවෙන් ඉන්ධන පිරවුම්හලේ සේවයෙන් ඉවත් කළ එහි හිටපු කළමනාකරු ඇතුළු පිරිසක් මෙම කඩාකප්පල්කාරී ක්‍රියාව කල බවට සමූපකාර සමිතියේ කළමනාකාරීත්වය සැක මතු කරනවා.
මෙම ගැටලුව හේතුවෙන් එම ඉන්ධන පිරවුම්හලෙන් ඩීසල් නිකුත් කිරිම පැය කිහිපයකට නවතා දමා තිබුණා.
අදාළ පිරවුම්හලෙන් ඩිසල් ලබා ගත් අතරමග නතර වු වාහන වෙනත් වාහන මාර්ගයෙන් එම ඉන්ධන පිරවුම්හල වෙත ඇදගෙන ඒමට වාහන හිමියන් කටයුතු කළා.
කෙසේ නමුත් මේ වනවිට ජලය මිශ්‍ර වී තිබුණු ඩීසල් ටැංකියේ ඩීසල් ඉවත් කොට ටැංකිය මුළුමනින්ම පිරිසිදු කිරීමට කටයුතු කළ බවත්, නැවත ප්‍රමිතියෙන් යුතු ඩීසල් නිකුත් කිරීම ඇරඹු බවත් සමූපකාර සමිතියේ සභාපතිවරයා සඳහන් කරනවා.
