බම්බලපිටිය දුම්රියපොළ අසල ආපනශාලාවක් ඉදිරිපිට සිට අනවසරයෙන් ඩ්‍රෝන කැමරාවක් ගුවන් ගත කරමින් සිටි පෞද්ගලික විශ්ව විද්‍යාලයක සිසුවෙක් අත්අඩංගුවට ගත් බව බම්බලපිටිය පොලිසිය පවසනවා.
ඒ, ආසන්නයේ පිහිටි ගොඩනැගිල්ලක 23 මහලේ ස්ථාපිත කර තිබෙන ජනාධිපති ගුවන් ආරක්ෂක අංශයේ මුරපොළේ රාජකාරියේ යෙදී සිටි ගුවන් හමුදා නිලධාරීන් මෙම ඩ්‍රෝන කැමරාව නිරීක්ෂණය කර එම පුද්ගලයා සහ කැමරාව ඔවුන්ගේ භාරයට ගෙන තිබූ බවයි පොලිසිය සඳහන් කළේ.
අනතුරුව බම්බලපිටිය පොලිසියේ අපරාධ අංශයේ ස්ථානාධිපතිවරයා ඇතුළු නිලධාරීන් එම ස්ථානයට ගොස් එම සිසුවා මෙන්ම ඩ්‍රෝන කැමරාව සහ එය හැසිරවීම සඳහා යොදාගත් උපකරණය මෙන්ම ජංගම දුරකථනයක් ද අත්අඩංගුවට ගෙන තිබෙනවා.
අඩංගුවට ගත් සැකකරුගෙන් ප්‍රශ්න කිරීමේ දී මෙම ඩ්‍රෝන කැමරාව ගුවන්ගත කර ඇත්තේ දුම්රියපොළ ඉදිරිපිට පිහිටා ඇති ආපනශාලා සමූහයට වසරක් පිරීම නිමිත්තෙන් එය සැමරීම සඳහා බවයි ප්‍රකාශ කර ඇත්තේ.
