බණ්ඩාරවෙල කොට්ඨාස අපරාධ විමර්ශන කාර්යංශයේ නිලධාරින් කණ්ඩායමක් සහ දියතලාව යුධ හමුදා කඳවුරේ නිළධාරින් කණ්ඩායමක් ඒකාබද්ධව හල්දුම්මුල්ල පොලිස් වසමේ ඉළුක්තැන්න රක්ෂිත ප්‍රදේශයේදී දින 02 ක් පුරා සිදු කළ මෙහෙයුමකදී අක්කර 08කට වැඩි භුමි ප්‍රදේශවල වගා කර තිබූ ගංජා හේන් 07ක් වටලා තිබෙනවා.
ඒ අතර අක්කර 2 ½ ක පමණ ප්‍රදේශයක වගා කර තිබූ ගංජා පැළ 36240 කින් පමණ යුත් ගංජා හේනක්, අක්කර 2 ½ ක පමණ ප්‍රදේශයක වගා කර තිබූ ගංජා පැළ 32850 කින් පමණ යුත් ගංජා හේනක්, අක්කර 02 ක පමණ ප්‍රදේශයක වගා කර තිබූ ගංජා පැළ 28220 කින් පමණ යුත් ගංජා හේනක්, අක්කර 01 ක පමණ ප්‍රදේශයක වගා කර තිබූ ගංජා පැළ 22140 කින් පමණ යුත් ගංජා හේනක්, අක්කර ½ ක පමණ ප්‍රදේශයක වගා කර තිබූ ගංජා පැළ 12770 කින් පමණ යුත් ගංජා හේනක්, අක්කර ¼ ක පමණ ප්‍රදේශයක වගා කර තිබූ ගංජා පැළ 8520 කින් පමණ යුත් ගංජා හේනක් සහ වියලි ගංජා කිලෝ 115 ක් මෙලෙස මෙම මෙහෙයුමේදී පොලිස් භාරයට ගෙන තිබෙනවා.
පසුව නඩු භාණ්ඩ ලෙස ගංජා හේන්වලින් ගංජා සාම්පල ලබා ගැනීමෙන් පසු ගංජා හේන් ගිනිතබා විනාශ කර තිබෙනවා.
කෙසේ වෙතත් වැටලීම් සිදුවන අවස්ථාවේ සැකකරුවන් පලාගොස් ඇති අතර සැකකරුවන් අත්අඩංගුවට ගැනීමට බණ්ඩාරවෙල කොට්ඨාස අපරාධ විමර්ශන කාර්යංශය වැඩිදුර විමර්ශන සිදු කරනු ලබනවා.
