බංග්ලාදේශ ක්‍රිකට් කණ්ඩායමේ දඟපන්දු යවන ක්‍රීඩක නයීම් හසන්ට එරට පොලිස් නිලධාරීන් පිරිසක් විසින් අමානුෂික ලෙස පහර දී ඇති බව වාර්තා වනවා.
නයීම් හසන් ඊයේ (13) රාත්‍රියේ චැටෝග්‍රෑම්හිදී මෙලෙස පොලිස් නිලධාරීන්ගේ පහරකෑමට ලක්ව ඇති බවයි වාර්තා වන්නේ.
තරගයකට සහභාගි වී ත්‍රීරෝද රථයකින් සිය නිවස බලා යමින් සිටි නයීම්ව, චැටෝග්‍රෑම්හි ලාල්ඛාන් බසාර් ප්‍රදේශයේ දී පොලීසිය නවතාගෙන තිබෙනවා.
අනතුරුව ඔහුව බලහත්කාරයෙන් වෙනත් ත්‍රීරෝද රථයකට නංවාගෙන පොලිස් ස්ථානය වෙත රැගෙන ගොස් ඇති බවයි තොරතුරු වාර්තා වන්නේ.
තමන් ජාතික ක්‍රිකට් ක්‍රීඩකයෙකු බව අවට සිටි පිරිස් සහ නයීම් විසින් ප්‍රකාශ කළ ද, පොලිස් නිලධාරීන් එය නොසලකා හරිමින් ඔහුව පොලිස් ස්ථානය වෙත රැගෙන යාමටයි කටයුතු කර ඇත්තේ.
අනතුරුව ඉවක් බවක් නොමැතිව පොලුවලින් සහ ප්ලාස්ටික් පයිප්පවලින් පොලිස්ම් නිලධරීන් විසින් තමන්ට පහර දුන් බවයි නයීම් පවසන්නේ.
මෙම අමානුෂික සිද්ධිය සම්බන්ධයෙන් සාධාරණ පරීක්ෂණයක් සහ යුක්තියක් තමන්ට අවශ්‍ය බවයි නයීම් වැඩිදුරටත් සඳහන් කර ඇත්තේ.
චටෝග්‍රෑම් මෙට්‍රොපොලිටන් පොලිසියේ නියෝජ්‍ය කොමසාරිස් අමිරුල් ඉස්ලාම් මාධ්‍ය වෙත පවසා ඇත්තේ, වැරදිකරුවන් වූ අයට එරෙහිව නිසි පියවර ගන්නා බවයි.
එමෙන්ම වගකිව යුතු ඕනෑම අයෙකු දඬුවම් පමුණුවන බවයි ඔහු වැඩිදුරටත් පවසා ඇත්තේ.
පොලිසියේ සිටි නයීම් සෙනසුරාදා අලුයම නිදහස්ව නිවසට පැමිණ ඇති අතර, ඔහුට සිදුවූ මෙම අමානුෂික සහ අසාධාරණ ක්‍රියාව සම්බන්ධයෙන් ප්‍රමුඛ බංග්ලාදේශ ක්‍රිකට් ක්‍රීඩකයින් ගණනාවක් ඔවුන්ගේ සමාජ මාධ්‍ය පිටුවල විරුද්ධත්වය පළකර තිබෙනවා.
