සංචාරක බංග්ලාදේශ කණ්ඩායම සහ ශ්‍රී ලංකාව අතර ජුලි මස 01 වැනිදා ඇරඹීමට නියමිත තරග තුනකින් සමන්විත එක්දින තරගාවලිය සඳහා බංග්ලාදේශ කණ්ඩායමේ වෙනස්කම් කිහිපයක් සිදු කර තිබෙනවා.
චැම්පියන්ස් කුසලාන තරගාවලියේ දී සිදු වූ අසාර්ථකත්වයෙන් පසු බංග්ලාදේශ කණ්ඩායම යළි ගොඩනැගීමේ ක්‍රියාවලිය සඳහා මෙලෙස එක්දින සංචිතයට කැඳවා ඇත්තේ ලිටන් දාස්, මොහොමඩ් නයිම්. ෂම්මි හොසේන්, තන්වීර් ඉස්ලාම් හා හසන් මහමුද් යන ක්‍රීඩකයින් බවයි වාර්තා වන්නේ.
මහමුදුල්ලා ජාත්‍යන්තර ක්‍රිකට් ක්‍රීඩාවෙන් විශ්‍රාම යාම සහ මුෂ්ෆිකර් රහීම් එක්දින තරගවලින් විශ්‍රාම යාම හේතුවෙන් මෙම වෙනස්කම් සිදු කළ බව ද වාර්තා වනවා.
ප්‍රධාන තේරීම් කමිටු සාමාජික ගාසි අෂ්රෆ් හොසේන් පැවසුවේ ලිටන් මෑතකදී බංග්ලාදේශ 20-20 නායකයා ලෙස නම් කරන ලද නිසා ඔහුට අවස්ථාව ලැබුණු බවයි.
ලිටන් 2023 දෙසැම්බර් මාසයේ නවසීලන්ත සංචාරය සහ 2024 දෙසැම්බර් මාසයේ බටහිර ඉන්දීය කොදෙව් සංචාරය අතර එක්දින තරග අටක දී ලකුණු 35ක් පමණක් ලබා ගැනීමත් ඔහුගේ දුර්වල පිතිකරණ රටාවෙන් පසුව ටෙස්ට් තරගාවලියේ දී වඩාත් හොඳින් ක්‍රීඩා කිරීමත් නැවත එක්දින තරගවලට කැඳවීමට හේතු විය හැකි බව ද සඳහන්.
මේ අතර ශ්‍රී ලංකාවට එරෙහිව ජුලි 01 වැනිදා කොළඹ ප්‍රේමදාස ක්‍රීඩාංගණයේ දී පැවැත්වීමට නියමිත එක්දින තරගාවලිය මෙහිඩි හසන්ගේ නායකත්වයෙන් යුත් බංග්ලාදේශ සංචිතය නම් කර තිබෙනවා.
