බංග්ලාදේශයේ අධිවේගී මාර්ගයක සිදු වූ බස් අනතුරකින් පුද්ගලයින් 19 දෙනෙකු මියගොස් 25 දෙනෙකු පමණ තුවාල ලබා තිබෙනවා.
අද ඉරිදා පෙරවරු 8ට පමණ රියදුරුට පාලනය කරගත නොහැකි වූ බසය මෑතකදී ඉදිකරන ලද ප්‍රධාන අධිවේගී මාර්ගයක ආරක්‍ෂිත වැටක ගැටී පෙරළී ඇති බවයි වාර්තා වන්නේ.
අනතුර සිදුවන විට බස් රථයේ මගීන් 40 කට වැඩි පිරිසක් ගමන් කරමින් සිට තිබෙනවා.
තුවාල ලැබුවන්ගෙන් පුද්ගලයින් 12 දෙනෙකුට පමණ බරපතල තුවාල සිදුවී ඇතැයි සඳහන්.
තුවාල ලැබූ මගීන්ගෙන් ඇතැමුන්ගේ තත්ත්වය බරපතල බැවින් මරණ සංඛ්‍යාව තවදුරටත් ඉහළ යා හැකි බවටයි පොලිසිය සැක කරන්නේ.
පැරණි, නිසි ලෙස නඩත්තුවක් නොමැති වාහන සහ මාර්ග මෙන්ම නිසි පුහුණුවක් නොමැති රියදුරන් හේතුවෙන් බංග්ලාදේශයේ මාර්ග අනතුරු නිරන්තරයෙන් සිදුවනවා.
2030 වසර වන විට මාරක රිය අනතුරු සියයට 50කින් අඩු කරන බවට බංග්ලාදේශ රජය පැවසුව ද මාරක රිය අනතුරු ඉහළ යමින් ඇති බවයි විදෙස් වාර්තා පෙන්වා දෙන්නේ.
