පෞද්ගලික ක්‍රිකට් ලීග නියෝජනය කරන කණ්ඩායම්වල රටේ නම භාවිත කිරීම තහනම් කිරීමට පාකිස්ථාන ක්‍රිකට් පාලක මණ්ඩලය කටයුතු කර තතිබෙනවා.
2025 ලෝක ශූරතා ලෙජන්ඩ්ස් ක්‍රිකට් තරගාවලියේ දී ඇති වූ ඉන්දියා – පාකිස්ථාන මතභේදයෙන් පසු පාකිස්ථාන ක්‍රිකට් මණ්ඩලය මෙම තීරණය ගෙන ඇති බවයි වාර්තා වුණේ.
මෙම තරගාවලියේ (WCL) දී ඉන්දියානු ක්‍රීඩකයින් ‘පාකිස්ථාන ශූරයන්’ කණ්ඩායමට එරෙහිව ක්‍රීඩා කිරීම ප්‍රතික්ෂේප කිරීමෙන් පසු පෞද්ගලික ක්‍රිකට් ලීග නියෝජනය කරන කණ්ඩායම්වල රටේ නම භාවිත කිරීම එම ක්‍රිකට් පාලක මණ්ඩලය මෙලෙස තහනම් කර ඇති බව සඳහන්.
පෙරේදා පැවති අධ්‍යක්ෂ මණ්ඩල රැස්වීමේ දී සිදුකළ සාකච්ඡාවකින් පසුව මෙම තීරණය ගෙන ඇති බවයි වාර්තා වන්නේ.
අනාගතයේදී, පෞද්ගලික ලීග සඳහා රටේ නම භාවිත කිරීමට කිසිදු පෞද්ගලික සංවිධානයකට අවසර ලබා නොදෙනු බව පවසන පාකිස්ථාන ක්‍රිකට් පාලක මණ්ඩලය, ‘පාකිස්ථාන ශූරයන්’ කණ්ඩායමට දකුණු අප්‍රිකාවට එරෙහිව අද දිනයේ පැවැත්වෙන 2025 ලෝක ශූරතා ලෙජන්ඩ්ස් ක්‍රිකට් තරගාවලියේ අවසන් මහා තරඟයට ක්‍රීඩා කිරීමට පමණක් පාකිස්ථාන නම භාවිත කිරීමට අවසර ලබා දී තිබෙනවා.
කිසියම් පෞද්ගලික සංවිධානයක් පාකිස්ථානයේ නම භාවිත කළහොත් නීතිමය ක්‍රියාමාර්ගවලට මුහුණ දෙනු ඇති බවයි පාකිස්ථාන ක්‍රිකට් මණ්ඩලය දැනුම් දෙන්නේ.
