ශ්‍රී ලංකා පොදුජන පෙරමුණේ හිටපු පාර්ලිමේන්තු මන්ත්‍රී සම්පත් අතුකෝරළට පුද්ගකයෙකු විසින් තියුණු ආයුධයකින් පහර දී තිබෙනවා.
පිටිගල පොලිස් වසමේ බඹරවාන ප්‍රදේශයේ දී ඊයේ (17) රාත්‍රියේ මෙම පහරදීම සිදුකර ඇති බවයි වාර්තා වුණේ.
මන්ත්‍රීවරයාට අයත් බව කියන වත්තක සේව්‍ය කරන සේවකයින් දෙදෙනෙක් අතර ඊයේ (17) රාත්‍රී කාලයේ ඇති වූ ආරවුලක් විසදීමට යාමේ දී එක් සේවකයෙක් විසින් මෙම ප්‍රහාරය එල්ල කර ඇති බවට පැමිණිල්ලක් ලැබී ඇති බවයි පොලිසිය පවසන්නේ.
එම අවස්ථාවේ දී තුවාල ලැබූ හිටපු මන්ත්‍රී සම්පත් අතුකෝරළ කරාපිටිය ජාතික රෝහලට ඇතුළත්ව ඇති අතර, ඔහු ප්‍රතිකාර ලබා රෝහලෙන් අද (18) පෙරවරුවේ පිටව ගොස් තිබෙනවා.
පිටිගල පොලිසිය සිද්ධිය පිළිබඳව පරීක්ෂණ පවත්වනු ලබනවා.
මේ පිළිබඳව දසත නිව්ස් මන්ත්‍රීවරයාගෙන් විමසීමක් කළ අතර, එහිදී ඔහු සඳහන් කළේ තමන් මේ වනවිට නිවසේ සිටින බවයි.
සමාජ මාධ්‍ය තුළ මෙම සිදුවීම පිළිබඳව ඇතැම් අසත්‍ය පුවත් හුවමාරුවන බවත් හිටපු මන්ත්‍රීවරයා වැඩිදුරටත් සඳහන් කළා.
