පසුගිය දින කිහිපයේදී සිදු වූ වෙඩි තැබීම්වලට සම්බන්ධව සැකකරුවන් තිදෙනෙක් දිවයිනේ ප්රදේශ කිහිපයකින් අත්අඩංගුවට ගැනීමට පොලිසිය ඊයේ (12) දිනයේ සමත් වී තිබෙනවා.
ගිය මස 07 වැනිදා බොරැල්ල, සහස්පුර සිරිසරඋයන ක්රිඩාංගණයේදී වෙඩි තබා පුද්ගලයින් දෙදෙනෙක් ඝාතනය කර තවත් පුද්ගලයින් තිදෙනෙක්ට තුවාල සිදුකිරීම සම්බන්ධයෙන් දමන පොලිස් වසමේදී මෙම අපරාධයේ වෙඩික්කරු බවට සැකකරන පුද්ගලයෙක් අයිස් මත්ද්රව්ය ග්රෑම් 10.71ක් හා යතුරුපැදියක් සමඟ ඊයේ (12) දහවල් කාලයේ දී අත්අඩංගුවට ගෙන තිබෙනවා.
සැකකරු යුධ හමුදාවෙන් පලාගොස් ඇති වයස අවුරුදු 34 ක් වන දමන, අම්පාර ප්රදේශයේ පදිංචිකරුවෙක්.
බොරලැස්ගමුව, මාලනී බුලත්සිංහල මාවතේදී පසුගිය 24වැනිදා ත්රිරෝද රථයකින් පැමිණ පුද්ගලයෙක්ට වෙඩි තබා ඝාතනය කිරීම සම්බන්ධයෙන් ඊයේ උදෑසන කාලයේ දී පිලියන්දල, පැලැන්වත්ත ප්රදේශයේදී සැකකරුවෙක් අත්අඩංගුවට ගත් බව පොලිසිය පවසනවා.
අත්අඩංගුවට පත්වන අවස්ථාවේදී සැකකරු සතුව අයිස් මත්ද්රව්ය ග්රෑම් 11 ක් ද සොයා ගෙන ඇති අතර ඔහු වයස අවුරුදු 35 ක් වන දෙහිවල ප්රදේශයේ පදිංචිකරුවෙක් බවයි පොලිසිය සඳහන් කළේ.
එමෙන්ම මරදාන පොලිස් වසමේ කෝවිල්වත්ත ප්රදේශයේදී ත්රිරෝද රථයකින් පැමිණ, පුද්ගලයෙක්ට වෙඩි තබා ඝාතනය කිරීමේ අපරාධය සම්බන්ධයෙන් මීට පෙර අත්අඩංගුවට ගත් සැකකරුවෙක්ගෙන් අනාවරණය වූ තොරතුරු මත කෙසෙල්වත්ත, ශාන්ත සෙබස්තියන් මාවතේ දී අපරාධය සිදු කිරීමට ආධාර අනුබල දුන් සැකකරුවෙක් අත්අඩංගුවට ගෙන තිබුණා.
සැකකරු වයස අවුරුදු 46 ක් වන කොළඹ 12 ප්රදේශයේ පදිංචිකරුවෙක්.
අත්අඩංගුවට පත් වූවන් සම්බන්ධයෙන් පොලිසිය වැඩිදුර විමර්ශනයන් සිදු කිරීමට නියමිතයි.
