අයුතු සහගත ලෙස අසත්ය චෝදනා ගොනුකරමින් තමාට එරෙහිව නඩු පැවරූ කොළඹ රථ වාහන පොලිසියේ නඩු පැවරුම් අංශයේ ස්ථානාධිපතිවරයාගෙන් රුපියල් මිලියන 200ක වන්දියක් අය කර දෙන ලෙස ඉල්ලා විදුලි සහ පුනර්ජනනීය බලශක්ති පාරිභෝගික සංගමයේ සභාපති මහේෂ් බණ්ඩාර ඉලංගසිංහ මහතා විසින් ගොනුකර තිබූ නඩු දෙකක් ලබන ජූනි මස 17 වන දින යළි කැඳවීමට කොළඹ අතිරේක දිසා විනිසුරු මහේෂා ද සිල්වා මහත්මිය අද (28) නියෝග කළා.
අධිකරණය විසින් මීට පෙර නිකුත් කරන ලද සිතාසි අනුව එම නඩුවල එක් විතිකරුවකු වන කොළඹ රථ වාහන පොලිසියේ නඩු පැවරුම් අංශයේ ස්ථානාධිපතිවරයා අද පෞද්ගලිකව අධිකරණය හමුවේ පෙනී සිටි අතර අනෙක් වගඋත්තරකරු ලෙස නම්කර සිටි නීතිපතිවරයා නඩු සම්බන්ධයෙන් පෙත්සම ගොනු කළේ.
ඒ අනුව පැමිණිලි පාර්ශ්වයට පිළිතුරු ගොනු කිරීමට කල් ලබා දුන් දිසා විනිසුරුවරිය එලෙස නඩුව කල්තැබීමට නියම කළා.
පසුගිය 2022 පෙබරවාරි මස 05 වන දින රාජගිරිය කොටා පාරේ පිහිටි දුම්රිය හරස් මාර්ගය හරහා සිය මෝටර් රථයෙන් තමා ගමන් කළ බවත් පසුව මාර්ගයේ රැඳී සිටි පොලිස් රථ වාහන අංශයේ නිලධාරියකු විසින් සිය රිය නවතා රියදුරු බලපත්රය ඉල්ලා සිටි බවත් ඒ වනවිට තමා සන්තකයේ තිබූ තාවකාලික රියදුරු බලපත්රය ඔහුට ඉදිරිපත් කළ බවත් පෙත්සම්කරු සිය පැමිණිල්ලෙන් පෙන්වා දී තිබුණා.
වලංගු රිය පැදවීමේ බලපත්රයක් නොමැතිව රිය පැදවීම හා දුම්රිය මාර්ගයේ සංඥා නොතකා අනතුරුදායක ලෙස රිය පැදවීම යන චෝදනා යටතේ පවරා තිබූ නඩුව විභාග කළ කොළඹ රථ වාහන අධිකරණයේ මහේස්ත්රාත්වරයා මෝටර් රථ ප්රවාහන කොමසාරිස් දෙපාර්තමේන්තුවේ නිලධාරීන් කැඳවා ලබාගත් සාක්ෂි අනුව තමන්ට වලංගුරිය පැදවීමේ බලපත්රයක් ඇති බවට නිගමනය කොට එම චෝදනාව හා දුම්රිය සංඥා නොතකා රිය පැදවූ බව කියන චෝදනාව පිළිගත නොහැකි බවට නිගමනය කොට එම චෝදනා දෙකෙන්ම තමා නිදොස් කොට අධිකරණයෙන් නිදහස් කළ බව හෙතෙම සිය පෙත්සම මගින් දිසා අධිකරණය හමුවේ ප්රකාශ කර තිබුණා.
2024 පෙබරවාරි මස 05 වන දින මහේස්ත්රාත්වරයා විසින් එම තීන්දුව නිකුත් කරන විට නඩුව පවරා වසර දෙකක් සම්පූර්ණ වී තිබූ බවත් විත්තිකාර රථවාහන අංශයේ ස්ථානාධිපතිවරයා නිසි විමර්ශනයකින් තොරව සිදුකළ එම නඩු පැවරීම හේතුවෙන් තමාට වරින් වර අධිකරණයේ හමුවේ පෙනී සිටීමට සිදුවීම හා සිදු වූ මූල්යමය පාඩුවට අදාළ වන්දි මුදල අයකර දෙන ලෙසට සිය පෙත්සම මගින් ඉල්ලා තිබෙන බවයි වාර්තා වන්නේ.
පැමිණිලිකාර පාර්ශ්වය වෙනුවෙන් නීතිඥ චලනි ද අල්විස් මහත්මිය අධිකරණය හමුවේ පෙනී සිටියා.
මේ ඉදිරිපත් විම අගය කල යුතුයි. සමාජයේ මුලික මිනිස් අයිතිවාසිකම් රැක ගන්න පුලුවන් වන්නේ මේවැනි නිර්භීත ඉදිරිපත් විම් වලින් පමණයි. අගතියට පත්වන සියලු දෙනා තම නිර්දොශි භාවය වෙනුවෙන් ඉදිරිපත් විමේන් සමාජය දියුණු වනවා. රට දියුණු වනවා.