මාවනැල්ල පොලිසිය විසින් කළ වෙඩි තැබීමකින් ඊයේ (06) දින රාත්‍රී 10.30ට පමණ අවුරුදු පනස් දෙකක පුද්ගලයෙක් ජිවිතක්ෂයට පත්ව තිබෙනවා.
මාවනැල්ල පදීදොර ප්‍රදේශයෙන් මාවනැල්ල පොලිසියේ ස්ථානාධිපතිතුමා වෙත ඊයේ (06) දින රාත්‍රි 8.40ට පැමිණිලි කිහිපයක්ම පැමිණෙන්නේ එම ගමෙහිම පදිංචි වයස අවුරුදු පනස් දෙකක් වන ජයතිලක යන පුද්ගලයා කඩුවක්ද රැගෙන තර්ජනය කරමින් නිවාස කිපයක් අවට සැරිසරන බවයි.
මේ සම්බන්ධයෙන් පොලිස් හදිසි ඇමතුම් ඒකකයටද තොරතුරු වාර්තා වනවාත් සමඟම එම අංශයේ රාජකාරියේ නියුතු නිලධාරීන් දෙදෙනෙක් අදාළ ගම්මානයට පිටත්වී තිබුණා .
ඔවුන් එහි යනවිටත් කාන්තාවක් සිර කරගෙන සිටි බවයි පොලිසිය සඳහන් කළේ.
එම කාන්තාව බේරගන්නවාත් සමග මියගිය පුද්ගලයා කඩුවකින් පොලිස් නිලධාරීන්ට පහර දී ඇති අතර මෙම සිද්ධිය අතරතුර පැමිණෙන මාවනැල්ල පොලිස් ජංගම රථයේ සිටි නිලධාරීන් ,පුද්ගලයන්ගේ ජීවිත ආරක්ෂාව වෙනුවෙන් සිදුකළ වෙඩි තැබීමේදී සැකකරු ජිවිතක්ෂයට පත්වුණා.
මෙලෙස මියගිය සැකකරුගේ පුත්‍රයාද මෙම සිද්ධියට සම්බන්ධ බවට පොලිසිය සැක පලකරන අතර ඔහු සොයා මේ වනවිට මෙහෙයුම් ක්‍රියාත්මකයි.
මියගිය පුද්ගලයාගේ මෘත ශරීරය මේ වන විට මාවනැල්ල මූලික රෝහලේ තැන්පත්කර ඇති අතර සිද්ධියෙන් කැපුම් තුවාල ලැබූ මාවනැල්ල පොලිසියේ රාජකාරියේ නියුතු සැරයන් වරුන් දෙදෙනෙකු මාවනැල්ල මූලික රෝහලේ ප්‍රතිකාර ලබනවා.
සිද්ධිය සම්බන්ධයෙන් පරීක්ෂණ කටයුතු පොලිසියේ උසස් නිලධාරීන් විසින් මේ වන විටත් ආරම්භ කර තිබෙනවා .
