පසුගියදා අවසන් වූ ලෝක කුසලාන ක්‍රිකට් තරගාවලියේ දී ශ්‍රී ලංකා කණ්ඩායම දැක්වූ දුර්වල ක්‍රීඩා රටාව සම්බන්ධයෙන් ඇතිවූ මත ගැටුම් මේ දක්වාත් අවසන් වී නැහැ.
ඊයේ සවස කොළඹ කෙත්තාරාම ක්‍රීඩාංගණයේ පැවති ජාතික පුහුණුකරුවන්ගේ රැස්වීමක් අතරමැද දීත් මේ ගැටලුව නැවතත් ඉස්මතු වී තිබෙනවා.
එම රැස්වීම සඳහා ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු ක්‍රිස් සිල්වර්වූඩ් සහ උසස් දක්ෂතා අංශය ප්‍රධානී ටිම් මැක්ස්කිල් ද එකතු වී සිටියා.
එහිදී ශ්‍රී ලංකා කණ්ඩායමේ දේශීය පුහුණුකරුවන් සහ විදේශීය පුහුණුකරුවන් අතර උණුසුම් වාද විවාද ඇති වී තිබෙනවා.
අවසානයේ මේ තත්ත්වය ගැටුමක් ඇති වීමට ආසන්න තත්ත්වයක් දක්වා වර්ධනය වූ බවයි ක්‍රීඩාංගණ ආරංචි මාර්ග සඳහන් කරන්නේ.
කෙසේ වෙතත් මේ අවස්ථාවේ එම උණුසුම් මත ගැටුමට මැදි වූ මහේල ජයවර්ධන ද අදාළ පාර්ශවයන්ට බරපතල ලෙස දෝෂාරෝපණය කර ඇති බව වාර්තා වනවා.
මෙම රැස්වීමේදී පන්දු රැකීමේ පුහුණුකරු විසින් ලෝක කුසලාන තරගාවලියේ අන්ත පරාජයට වගකිව යුත්තේ දුර්වල පිතිකරණය බවට චෝදනා කර ඇති අතර එහි වගකීම නවීඩ් නවාස් විසින් බාරගත යුතු බවයි ඔහු සඳහන් කර ඇත්තේ.
මෙලෙස පිතිකරණ පුහුණුකරුට චෝදනා කරන පන්දු රැකීමේ පුහුණුකරු වගකීම් දැරු ශ්‍රී ලංකා කණ්ඩායම මෙවර ලෝක කුසලාන තරගාවලිය තුලදී වැඩිම උඩපන්දු සංඛ්‍යාවක් අතහැරි කණ්ඩායම ලෙස වාර්තාවක් ද පිහිටවනු ලැබුවා.
සමස්ත ලෝක කුසලාන තරගාවලිය තුළදී ශ්‍රී ලංකා කණ්ඩායමේ පන්දු රකින්නන් විසින් අතහැර දැමූ උඩපන්දු සංඛ්‍යාව 22ක්.
