පුංචි ඡන්දය ගැන අධිකරණ තීන්දුව හෙට පාර්ලිමේන්තුවට

පළාත් පාලන මැතිවරණය සම්බන්ධයෙන් වන ශ්‍රේෂ්ඨාධිකරණ තීරණය හෙට (14) පාර්ලිමේන්තුවට ඉදිරිපත් කිරීමට නියමිත යි.

ඒ අනුව අදාළ තීරණය සම්බන්ධව පැවැත්වෙන විවාදය ලබන සඳුදා (17) පාර්ලිමේන්තුවේ දී විවාදයට ගැනීමට සූදානමින් ඇති බවයි වාර්තා වන්නේ.

අදාළ තීරණය පාර්ලිමේන්තුවේ දී සම්මත වුවහොත් ඊට පසු දින නාමයෝජනා යළි කැදවීමේ බලය මැතිවරණ කොමිෂන් සභාවට හිමිවනවා.

අවම දිනවල දී මැතිවරණය කැඳවනු ලැබුවහොත් ඡන්ද විමසීම අප්‍රේල් මස 11වන දා පැවැත්වීමට නියමිතයි.

එහෙත් මැතිරණය එදිනට පැවැත්වීම පිළිබඳ ප්‍රායෝගික ගැටලු රැසක් පවතින බැවින් පළාත් පාලන මැතිවරණයට අදාළ ව ඡන්ද පත්‍රිකා වර්ග 340ක් මුද්‍රණය කළ යුතු අතර ඒ සඳහා අවම කාලය ප්‍රමාණවත් නොවෙනු ඇති බවයි සඳහන් වන්නේ.

එමෙන්ම සිංහල හා හින්දු අලුත් අවුරුද්ද හේතුවෙන් අප්‍රේල් 11 වන දින මැතිවරණය පැවැත්වීමේ ප්‍රායෝගික ගැටලු මතුවනු ඇති.

මෙම තත්ත්වයන් මත පළාත් පාලන මැතිවරණය පැවැත්වීම සඳහා මැතිවරණ කොමිසම උපරිම දින ගණනක් යොදා ගැනීමට සිදුවනවා.

එසේ වුවහොත් මැතිවරණය පැවැත්වීම අප්‍රේල් 20ත් 30ත් අතර දිනක දී සිදු කිරීමට නියමිතයි.

ඒ, අනුව ඒ සඳහා සුදුසුම දිනය වනුයේ අප්‍රේල් මස 22 හෝ 25 වන දින වන බවයි වාර්තා වන්නේ.