පිළියන්දල, බෝකුන්දර ප්රදේශයේ දී අද (19) අලුයම පොලිසියට තියුණු ආයුධයකින් පහර දී පලාගිය සැකකරුගේ යතුරුපැදිය පොලීසිය විසින් සොයාගෙන තිබෙනවා.
පිළියන්දල – මහරගම මාර්ගයේ නිවසක් අසල පිහිටි වත්තක දමාගොස් තිබිය දී පොලිසිය විසින් මෙම යතුරුපඩිය සොයාගෙන ඇති බවයි වාර්තා වුණේ.
බොරලැස්ගමුව ඕ.පී.පෙරේරා මාවතේ නිවසකට යතුරුපැදි දෙකකින් තියුණු ආයුධ සහිතව පැමිණි පිරිසක් එහි නිවැසියන්ට පහරදී නිවසට බරපතළ හානි සිදුකර ඇති බවට අද (19) අලුයම බොරලැස්ගමුව පොලීසියට තොරතුරක් ලැබී තිබුණා.
එම සැකකරුවන් පිළියන්දල දෙසට පලායන බවයි පොලිසියට පසුව තොරතුරු වාර්තා වී තිබුණේ.
ඒ, අනුව පොලීසිය විසින් බෝකුන්දර, වීරසිංහ මාවත ප්රදේශයේ රැකවල්ලා සිටිය දී යතුරුපැදියකින් පලායමින් සිටි සැකකරුවන් දෙදෙනෙකු පොලිසිය සිටිනවා දැක යතුරුපැදිය ආපසු හරවාගෙන යාමටයි උත්සාහ දරා ඇත්තේ.
එම අවස්ථාවේ දී යතුරුපැදිය නවත්වාගැනීමට පොලිස් නිලධාරින් උත්සාහා කිරීමේ දී යතුරුපැදියේ පිටුපස සිටි පුද්ගලයා තියුණු ආයුධයකින් පොලිස් නිලධාරිට පහර දී තිබුණා.
එහිදී පොලිස් නිලධාරියෙක් පසු පැදිකරු ඉලක්ක කර වෙඩිතබා ඇති අතර, වෙඩි ප්රහාරය සැකකරුගේ ඉන ප්රදේශයට එල්ලවී ඔහු යතුරුපැදියෙන් බිමට වැටී ඇති බවයි වාර්තා වුණේ.
එම අවස්ථාවේ දී පොලිස් නිලධාරීන් විසින් යතුරුපැදියෙන් වැටුණු පසුපැදිකරු අත්අඩංගුවට ගෙන ඇති අතර, යතුරුපැදිකරු පලාගොස් තිබුණා.
එලෙස පලාගිය යතුරුපැදිය අතර මඟ දමාගොස් තිබිය දී අද දහවල් මෙලෙස හමු වී තිබෙනවා.
මේ අතර වෙඩි ප්රහාරයට ලක්වූ සැකකරු සහ සැකකරුගේ තියුණු ආයුධ ප්රහාරයෙන් තුවාල ලැබූ පොලිස් කොස්තාපල්වරයා කළුබෝවිල ශික්ෂණ රෝහලේ ප්රතිකාර ලබන බවයි වාර්තා වුණේ.
ඊට අමතරව සැකකරුවන්ගේ පහර කෑමට ලක්වූ නිවසේ තරුණියක් ද එම රෝහලටම ඇතුළත් කර ප්රතිකාර ලබනවා.
අත්අඩංගුවට ගැනුණු සැකකරු බණ්ඩාරගම වීදියගොඩ ප්රදේශයේ පදිංචි 24 හැවිරිදි අයෙක් වන අතර, අනෙක් සැකකරුවන් සොයා පිළියන්දල සහ බොරලැස්ගමුව පොලිස් ස්ථාන විමර්ශන අරඹා තිබෙනවා.
