මේ වනවිට ආසියානු කලාපයේ සංචාරයක නියැලී සිටින ශුද්ධෝත්තම ෆ්‍රැන්සිස් පාප් වහන්සේ ඉන්දුනීසියා සංචාරය අවසන් කිරීමෙන් පසු පැපුවා නිව්ගිනියාව වෙත පැමිණියා.
දේශීය මිෂනාරිවරුන්ගේ ආරාධනයකට අනුව පැපුවා නිව්ගිනියාවට පැමිණි පාප් වහන්සේට එහිදී හිමි වුණේ උණුසුම් පිළිගැනීමක්.
පැපුවා නිව්ගිනියාවේ වැනිමෝ වෙරළ නගරයේ දී සාම්ප්‍රදායික බර්ඩ් ඔෆ් පැරඩයිස් පිහාටු සහිත හිස් පළඳනාවක් පළඳවමින් පැපුවා නිව්ගිනියා බලධාරීන් විසින් උන්වහන්සේ පිළිගත්තා.
අනතුරුව අගනුවරවන පෝර්ට් මෝර්ස්බි නගරයේ දී පාප් වහන්සේ විසින් දේව මෙහෙයක් ද පැවැත් වූ අතර, 35,000 කට අධික පිරිසක් ඊට සහභාගීව සිටි බවයි වාර්තා වුණේ.
ෆ්‍රැන්සිස් පාප් වහන්සේ අද දිනය දක්වා පැපුවා නිව්ගිනියා සංචාරයේ නිරත වන අතර, උන්වහන්සේ නැවත රෝමයට යාමට පෙර නැගෙනහිර ටිමෝරයට සහ සිංගප්පූරුවට පැමිණීමට නියමිතයි.
