ආගමන විගමන දෙපාර්තමේන්තුවේ වවුනියාව ප්රාදේශීය කාර්යාලය ඉදිරිපස ගැටුම්කාරි තත්ත්වයක් හටගෙන ඇති බව විදෙස් ගමන් බලපත්ර ලබා ගැනීමට පැමිණි ජනතාව පවසනවා.
ඔවුන් පවසන්නේ ඇතැමෙක් දින තුන හතරකට වැඩි කාලයක් පෝලීම්වල සිටින අතර, දිනකට වවුනියාව ප්රාදේශීය කාර්යාලය හරහා විදෙස් ගමන් බලපත් 25ක් පමණක් ලබාදෙන බවයි.
විදෙස් ගමන් බලපත්ර ලබා ගැනීම සඳහා ලබාදෙන අංක තැරැව්කරුවන් විසින් ජාවාරම් කිරීමේ තත්ත්වයක් ද උද්ගත වී ඇති බවයි වාර්තාවන්නේ.
ආගමන විගමන දෙපාර්තමේන්තු වවුනියාව ප්රාදේශීය කාර්යාලය ඉදිරිපස කුණු කාණුවක් මත හිඳගෙන ජනතාව දින ගණන් සිටින බවයි අප ප්රාදේශීය වාර්තාකරු පැවසුවේ.
පවතින අර්බුදකාරි තත්ත්වය පාලනය කිරීමට වවුනියාව පොලිසිය යෙදවීමට ද සිදුව ඇති අතර, ඊයේ (28) අදාළ ස්ථානයේ ගැටුමක් ඇති වී තත්ත්වය පාලනයට අමතර පොලිස් කණ්ඩායමක් ද යොදවා තිබෙනවා.
ආගමන විගමන දෙපාර්තමේන්තු වවුනියාව ප්රාදේශීය කාර්යාලය හරහා දිනකට ලබාදෙන විදෙස් ගමන් බලපත් ප්රමාණය 75ක් දක්වා හෝ වැඩි කිරීමට පියවර ගත යුතු බවත්, ජනතාවගේ පැමිණීම කළමනාකරණයට පියවරක් ගත යුතු බවත් විදෙස් ගමන් බලපත් ලබා ගැනීමට පැමිණි පිරිස් කියා සිටියා.
එහිදී උතුරු පළාත, උතුරු මැද පළාත, නැගෙනහිර පළාත හා වයඹ පළාතේ බොහෝ පිරිසක් විදෙස් ගමන් බලපත් ලබා ගැනීමට වවුනියාව ආගමන විගමන දෙපාර්තමේන්තු ප්රාදේශීය කාර්යාලය වෙත පැමිණෙන බවයි අප වාර්තාකරු සඳහන් කළේ.
