පාස්කු ඉරු දින ප්‍රහාරයෙන් වසර 4ක් සම්පූර්ණ වන අවස්ථාවේ හිටපු නියෝජ්‍ය පොලිස්පති පාලිත සිරිවර්ධන එම ප්‍රහාරය සම්බන්ධයෙන් සුවිශේෂී අනාවරණයක් සිදු කරනු ලැබුවා.
දසත ලංකා ප්‍රවෘත්ති සමග විශේෂ සම්මුඛ සාකච්ඡාවකට එක්වෙමින් ඔහු අවධාරණය කළේ මෙම ප්‍රහාරය සියයට සියයක්ම වළක්වා ගැනීමට පොලිස් දෙපාර්තමේන්තුවට හැකියාව පැවති බවයි.
සහරාන්ගේ ක්‍රියාකලාපය සම්බන්ධයෙන් මෙන්ම ප්‍රහාරයට අදාළ තොරතුරු මුල සිටම ලැබී තිබූ බවයි හිටපු නියෝජ්‍ය පොලිස්පතිවරයා පෙන්වා දෙන්නේ.
එහෙත් පොලිස් දෙපාර්තමේන්තුවේ පැවති පැහැර හැරීම් සහ විමර්ශන නිසි ලෙස සිදු නොවීම හමුවේ ප්‍රහාරයට අවස්ථාව ලැබුණු බව පාලිත සිරිවර්ධන මහතා සඳහන් කළා.
කලින් කලට විමර්ශනවලට විවිධ කණ්ඩායම් පරීක්ෂණවලට එක් වීම ඇතුලු කරුණු හමුවේ කිසිදු දිනක මෙම ප්‍රහාරයට සම්බන්ධ පරීක්ෂණවල අවසානයක් දැක ගැනීමට නොහැකි බවයි ඔහු පෙන්වා දෙන්නේ.
මෙම ප්‍රහාරයට අදාළව කොමිෂන් සභා තුනක් මේවන විට පත්කර ඇති අතර ඔවුන් ලබා දුන් විවිධ නිර්දේශ අනුව ද විමර්ශණ කණ්ඩායම් මෙතෙක් ක්‍රියාත්මක වී නොමැති බව හිටපු නියෝජ්‍ය පොලිස්පතිවරයා සඳහන් කළා.
රාජ්‍ය බුද්ධි සේවය, පොලිස් දෙපාර්තමේන්තුව මෙන්ම විශේෂ කාර්ය බලකායේ නිලධාරීන්ට පාස්කු ප්‍රහාරය සම්බන්ධයෙන් නීතිය ක්‍රියාත්මක විය යුතු අතර ප්‍රහාරය වළක්වා ගැනීමට ඔවුන්ට ඕනෑතරම් හැකියාව පැවති බවයි හිටපු නියෝජ්‍ය පොලිස්පති පාලිත සිරිවර්ධන මහතා අනාවරණ කළේ.
පාස්කු ප්‍රහාරයට අදාළව ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ඇතුලු පොලිස් නිලධාරීන් පිරිසකට විනයානුකූලව පියවර ගැනීමට ලිපි යොමු වී ඇතත් මෙතෙක් ඒ සම්බන්ධයෙන් කිසිදු ක්‍රියාමාර්ගයක් නොගැනීම සම්බන්ධයෙන් ද ඔහු මෙහිදී හෙළි කළා.
