පාසල් ළමුන් බසයට නංවා ගැනීම ප්‍රතික්ෂේප කළ රියදුරු සහ කොන්දොස්තරවරයෙකුගේ වැඩ තහනමකට ලක් කර තිබෙනවා.
දසත ප්‍රාදේශීය වාර්තාකරු පැවසුවේ කළුතර දිස්ත්‍රික් ප්‍රධාන ප්‍රාදේශීය කළමනාකාර කාර්යාලය මේ බව ප්‍රකාශ කළ බවයි.
මෙලෙස වැඩ තහනමට ලක්ව ඇත්තේ අලුත්ගම – කොළඹ ධාවනය වූ අලුත්ගම ඩිපෝවට අයත් අංක NC – 0755 බස් රථයේ සේවය කළ රියදුරු සහ කොන්දොස්තරවරයාගේ රාජකාරි කටයුතු බවයි වාර්තා වන්නේ.
අලුත්ගම, මතුගම සහ කළුතර ඩිපෝවට අයත් බස් රථ කළුතර සහ වාද්දුව අතර රැඳී සිටින පාසල් ළමුන් කාලයක පටන්ම නංවාගැනීම ප්‍රතික්ෂේප කරන බවට වත්මන් සභාපති රමාල් සිරිවර්ධන මහතාට ලද තොරතුරක් මත එම ඩිපෝවල අධිකාරිවරුන් පාසල් ළමුන් රැඳී සිටින බස් නැවතුම්පොළවල්වල රඳවා බස්රථ නවත්වන ලෙස සභාපතිවරයාගේ උපදෙස් පරිදි නිලධාරින් ක්‍රියාත්මක වී තිබෙනවා.
එහෙත් එදින පමණක් එම බසය නවත්වා පසුව නැවත නොනවත්වා ධාවනය කිරීමට එම රියදුරන් කටයුතු කර ඇති බවට වාර්තා වූ බව කළුතර ලංගම උසස් නිලධාරියෙක් ප්‍රකාශ කර ඇති බවයි සඳහන් වන්නේ.
ඒ අනුව අද (06) දිනයේ දී නැවත ඩිපෝ අධිකාරිවරුන් මෙන් ම ජංගම පරීක්ෂකවරුන් ද යොදවා පරීක්ෂා කිරීමේ දී රියදුරු සහ කොන්දොස්තරවරයා එම නිලධාරින් සමග ද බහින්බස් වීමක් සිදු කරගෙන තිබෙනවා.
එහිදී බස් රථ රියදුරු විසින් පවසා ඇත්තේ “මොකා කීවත් ආයේ නවත්වන්නේ නෑ, පුළුවන් දෙයක් කරන්න” යනුවෙන්.
එම සිද්ධිය ජංගම දුරකථන දර්ශන සමගින් ලංගම නව සභාපති රමාල් සිරිවර්ධන මහතාට සැලවීමත් සමගින් අදාළ රියදුරු සහ කොන්දොස්තරවරයා සේවයෙන් පහකිරීමට පියවර ගත් බව කළුතර දිස්ත්‍රික් ප්‍රධාන ප්‍රාදේශීය කළමනාකාර කාර්යාලය නිවේදනය කළා.
පාසල් සිසුන් කාලයක සිට මෙම ගැටලුවට මුහුණපා ඇති අතර, පැවති පරිපාලන දුර්වලතා හේතුවෙන් රියදුරන් සහ කොන්දොස්තරවරුන් සිය අභිමතය පරිදි මගීන් නංවාගැනීම සිදුකර ඇති බවත් ලංගම ආරංචි මාර්ග තහවුරු කරනවා.
