මොරගහහේන, හෝමාගම මාර්ගයේ යකහළුව ප්රදේශයේ දී සිදුවූ රිය අනතුරකින් 17 හැවිරිදි පාසල් සිසුවෙක් මියගොස් තිබේ.
මෝටර් රථ දෙකක් මුහුණට මුහුණ ගැටී අද (24) අලුයම එම අනතුර සිදුව ඇති බව අප වාර්තාකරු පැවසීය.
අදාළ රිය අනතුරින් තවත් තිදෙනෙකු රෝහල් ගත කර ඇති අතර ඉන් එක් පුද්ගලයෙකුගේ තත්ත්වය බරපතළ බව පොලීසිය පවසයි.
මියගොස් ඇති පාසල් සිසුවා හොරණ, මිල්ලෑව ප්රදේශයේ පදිංචිකරුවෙකි.
මියගිය සිසුවා තවත් තරුණයන් තිදෙනකු සමග කහතුඩුව ජයවර්ධන වත්ත ප්රදේශයේ මිතුරකුගේ නිවසේ පැවැති සාදයකට ගොස් මිල්ලෑව ප්රදේශයේ පිහිටි නිවස බලා යළි පැමිණෙමින් සිටියදී එම අනතුර සිදුව ඇත.
මොරගහහෙන යකහළුව වංගුවේදී මෝටර් රථය මාර්ගයේ ප්රතිවිරුද්ධ දිසාවට ගොස් මොරගහහේන සිට හෝමාගම දෙසට ගමන් කරමින් තිබූ මෝටර් රථයක මුහුණට මුහුණ ගැටී අනතුර සිදුව තිබේ.
අනතුරින් මියගොස් ඇත්තේ මෝටර් රථයේ ඉදිරිපස වම්පස ආසනයේ ගමන් ගත් සිසුවෙකු බවත් ඊට පිටුපස අසුනේ ගමන් ගත් පුද්ගලයා බරපතළ තුවාල ලබා ඇති බවත් පොලීසිය පවසයි.
අනතුර සිදුවු අවස්ථාවේ දීම තරුණයන් ගමන්ගත් මෝටර් රථයේ ඉදිරිපස සිරවී සිටි මියගිය සිසුවාව දැඩි පරිශ්රමයක් දරා පිටතට ගත්තද ඔහු ඒ වන විටත් මිය ගොස් තිබූ බව වාර්තා වෙයි.
අනෙක් මෝටර් රථය අනතුරට ලක්වීමත් සමග ම විසි වී ගොස් අසල තාප්පයක ගැටී නතර වී තිබුණි.
සිද්ධිය සම්බන්ධයෙන් මොරගහහේන පොලීසිය වැඩිදුර පරීක්ෂණ පවත්වයි.
