කළුතර කලාපයට අයත් බේරුවල කොට්ඨාස අධ්‍යාපන කාර්යාල බල සීමාවේ පිහිටා ඇති අලුත්ගම – දර්ගා නගරය, වරාපිටිය ප්‍රාථමික විද්‍යාලයේ ප්‍රධාන ශාලාවෙන් ඉපැරණි මිනිරන් පතලක නටබුන් හමු ව තිබෙනවා.
අප ප්‍රාදේශීය වාර්තාකරු සඳහන් කළේ; මෙම පාසලේ ප්‍රධාන ශාලාව මේ වනවිට (24) ගිලා බැසීමකට ලක් ව ඇති අතර; එම ගිලා බැසි ස්ථානයෙන් මිනිරන් පතලක කොටස් හමු ව ඇති බවයි.
මේ හේතුවෙන් එම ප්‍රධාන ශාලාව කේන්ද්‍ර කරගනිමින් පැවැත්වූ ප්‍රාථමික ශ්‍රේණිවල අධ්‍යාපන කටයුතුවලට දැඩි බලපෑමක් ද එල්ල වී තිබෙනවා.
මෙම පාසලේ සිසුන් 350කට ආසන්න සංඛ්‍යාවක් අධ්‍යාපනය ලබන අතර මිනිරන් පතල මතු වීම හේතුවෙන් මේ වනවිට අදාළ ගොඩනැගිල්ල සම්පූර්ණයෙන් ම වසා දමා ඇති බවයි පැවසෙන්නේ.
එම ගොඩනැගිල්ලේ තිබූ පන්ති දෙකක් ද වෙනත් ගොඩනැගිල්ලකට රැගෙන යාම හේතුවෙන් විදුහල්පතිවරයා ඇතුළු ආචාර්‍යය මණ්ඩලය සේ ම සිසු දරුවන් ද ඉන් මහත් පීඩාවකට ලක් ව තිබෙනවා.
මිනිරන් පතල මතු වූ ස්ථානය මේ වනවිට කැඩුණු පුටු දමා වසා ඇති අතර; ඇතැම් අවස්ථාවල එම ප්‍රදේශයට ප්‍රාථමික ශ්‍රේණිවල කුඩා දරුවන් සෙල්ලම් කිරීමට යාමට ඉඩකඩ ඇති බවත් හදිසියේ හෝ එම දරුවන්ට පය ලිස්සා එම කුහරයට ඇද වැටුණොත් විශාල හානි සිදු වීමේ ඉඩකඩක් ද ඇති බවටයි සිසුන්ගේ දෙමාපියන් චෝදනා කරන්නේ.
එබැවින් පාසල් බලධාරීන් සහ දෙමාපියන් වගකිව යුතු අධ්‍යාපනික බලධාරින්ගෙන් ඉල්ලා සිටින්නේ මෙම කුහරය කඩිනමින් වසා දමා දරුවන්ට සුරක්ෂිත ලෙස පාසලේ යළි අධ්‍යාපනය ලැබීමට අවශ්‍ය වටපිටාව සකස් කරදෙන ලෙසයි.
