රටේ පාලකයින්ට බිය වී සිටි යුගය අවසන් කර රටේ ජනතාවට වගකියන රජයක් පිහිටුවන බව ජාතික ජන බලවේගයේ ජනාධිපති අපේක්ෂක අනුර කුමාර දිසානායක පවසනවා.
ජනාධිපති අපේක්ෂක අනුර කුමාර දිසානායකගේ ජයග්‍රහණය තහවුරු කරන ජනරැළි මාලාවේ තලවකැලේ දී අද (15) පැවති ජනරැළිය අමතමින් ඔහු මේ බව සඳහන් කළා.
මෙහිදී වැඩිදුරටත් අදහස් දැක්වූ අනුර කුමාර දිසානායක පැවසුවේ වතුකරයේ ජනතාව මෙරටට පැමිණ වසර 200ක් ගත වී ඇතත්, එම ජනතාවගේ ආර්ථික තත්ත්වය, සෞඛ්‍ය තත්ත්වය, නිවාස ගැටළුව, එම ජනතාවගේ දරුවන්ගේ අධ්‍යාපන
තත්ත්වය ඉහළ දැමීමට කිසිදු පාලකයෙකු මේ වන තෙක් කටයුතු කර නොමැති බවයි.
තම රජයක් යටතේ වතුකරයේ ජනතාව මේ රටේ ආර්ථිකය ඉහළ දැමීමට සහ ඔවුන්ගේ ආදායම් තත්ත්වය ඉහළ දැමීමට හැකි වැඩපිළිවෙලක් දියත් කරන බවත්, රටේ අනෙකුත් ජනතාවට තිබෙන අයිතිවාසිකම් වතුකරයේ ජනතාවට ද ලබාදීමට කටයුතු කරන බව ඔහු මෙහිදී සඳහන් කළා.
මේ අතර රටේ තේ ආර්ථිකය ගොඩගැනිම සඳහා වතු සමාගම් කිහිපයක් එක්ව සකස් කරන ලද ප්‍රඥප්තියක් වැවිලිකරුවන්ගේ සංගමයේ නිලධාරින් පිරිසක් විසින් ජාතික ජනබලවේගයේ නායක අනුර කුමාර දිසානායක වෙත මෙහි දී පිළිගන්වනු ලැබුවා.
