පානය කිරීමට ජලය ගන්නා ළිඳ අපිරිසිදු කළා යැයි පුද්ගලයෙකු තවත් අයෙකුට බෝතලයෙන් තුන් වතාවක් ඇන; පහර දී තිබෙනවා.
එම පහරකෑමට ලක් වූ පුද්ගලයා තුවාල ලබා අසාධ්‍ය ව කළුතර ශික්ෂණ රෝහලට ඇතුළත් කර ඇති බවයි වාර්තා වන්නේ.
ඊයේ සවස අළුත්ගම පොලිස් වසමේ දන්වත්තගොඩ, පැණිබැඳිගොඩ ප්‍රදේශයේ පදිංචි අසල්වාසීන් දෙපිරිසක් අතර ඇති වූ ආරවුලක් දුරදිග ගොස් මෙම අපරාධය සිදු ව තිබෙනවා.
එක් අයෙකු තවත් අයෙකුට බෝතලයක් කඩා ගෙළ ප්‍රදේශයට, පපු සහ පිට ප්‍රදේශයට තෙවරක් ඇන බරපතළ තුවාල සිදුකර ඇති බවයි වාර්තා වන්නේ.
දෙපිරිස ම ජලය පානය සඳහා යොදා ගන්නා ළිඳ තුළට ඊයේ උදෑසන කුකුළෙකු වැටී මියගොස් තිබෙනවා.
ඉන් පසුව එක් පාර්ශ්වයක් තවත් පාර්ශ්වයකට මෙම කුකුළා ඉවත් කරන ලෙස දන්වා ඇති අතර ඉන් පසුව එම කුකුළා ඉවත් කිරීම එක් පාර්ශ්වයක් ප්‍රතික්ෂේප කර ඇති බවයි වාර්තා වන්නේ.
එහිදී ඇති වූ වචන හුවමාරුවක් දුරදිග ගොස් වයස අවුරුදු 29 වියැති පුද්ගලයකු විසින් වයස අවුරුදු 52 වියැති අසල්වැසි පුද්ගලයාට අසල තිබූ බෝතලයක් කඩා පහර දී තිබෙනවා.
තුවාල ලැබූ පුද්ගලයාගේ තත්ත්වය බරපතළ බවත්, 29 හැවිරිදි තරුණයා සැඟව සිටියදී අලුත්ගම පොලිසිය අත් අඩංගුවට ගෙන ඇති බවත් වාර්තා වනවා.
සැකකරු අද දින කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
