පානදුර මුහුදේ අද (08) පස්වරුවේ විනෝදයට දියනාමින් සිටි තරුණයන් දෙදෙනෙක් රළ පහරට හසුව ගසාගෙන ගොස් තිබෙනවා.
එක් තරුණයෙකු අතුරුදන්ව, අනෙක් තරුණයා බේරාගෙන ඇති බවයි පානදුර ජීවිත ආරක්ෂක ඒකකය පවසන්නේ.
මෙසේ අතුරුදන්ව ඇත්තේ පානදුර, තොටවත්ත ප්‍රදේශයේ පදිංචිව සිටි මොහොමඩ් රිහාන් නමැති 23 හැවිරිදි තරුණයෙක්.
මිතුරන් පස්දෙනෙකු පානදුර ළමා උද්‍යානය ඉදිරිපිට මුහුදේ දියනාමින් සිටිය දී තරුණයන් දෙදෙනෙක් මෙලෙස ගසාගෙන ගොස් ඇති බවයි අප වාර්තාකරු සඳහන් කළේ.
පසුව පොලිස් සහ නාවික ජීවිත ආරක්ෂක නිළධාරීන් විසින් එක් තරුණයෙකු බේරාගෙන ඇති අතර, අනෙක් තරුණයා රළ පහරට හසුව එක්වරම නොපෙනී ගිය බව ජීවිත ආරක්ෂක නිලධාරියෙක් පවසා තිබුණා.
අතුරුදන්ව ඇති තරුණයා සොයා පොලිස් සහ නාවික හමුදා ජීවිත ආරක්ෂක නිලධාරීන් රාත්‍රියේත් පානදුර වෙරළේ නිරීක්ෂණය කරමින් සිටින බව ජීවිත ආරක්ෂක ඒකකය සඳහන් කළා.
බේරාගත් තරුණයා ප්‍රථමාධාර ලබාදීමෙන් පසු පානදුර මූලික රෝහලට යොමුකර තිබෙනවා.
