ඉහළ යන බලශක්ති පිරිවැය සහ විදේශයන්හි වෙසෙන පාකිස්ථානුවන්ගෙන් රට තුළට ලැබෙන ප්රේෂණ සඳහා එල්ල විය හැකි පීඩනය සැලකිල්ලට ගනිමින්, ආසියානු සංවර්ධන බැංකුව විසින් පාකිස්ථානයේ ඉදිරි ආර්ථික වර්ධන පුරෝකථනය 3.7%ක් දක්වා පහත හෙළා ඇති බව ‘ඩෝන්’ පුවත් සේවය වාර්තා කරනවා.
මැනිලා නුවර පදනම් කරගත් ආසියානු සංවර්ධන බැංකුව සිය 2026 ජූලි ‘ආසියානු සංවර්ධන ඉදිරිදර්ශන’ වාර්තාව මඟින් සමස්ත ආසියා සහ පැසිෆික් කලාපයේ ද ආර්ථික වර්ධන වේගය 4.9%ක් දක්වා අඩු කර තිබෙනවා.
මැදපෙළ පෙරදිග ගැටුම් හේතුවෙන් ගෝලීය බලශක්ති වෙළඳපොළට, පොහොර සහ අනෙකුත් අත්යවශ්ය ද්රව්ය සැපයුම් දාමයන්ට එල්ල වී ඇති බාධා හේතුවෙන් කලාපීය උද්ධමනය මේ වසරේදී 4.3%ක් දක්වා ඉහළ යනු ඇතැයි ද බැංකුව අනතුරු අඟවනවා.
ADB ප්රධාන ආර්ථික විද්යාඥ ඇල්බට් පාර්ක් ප්රකාශ කරන්නේ, “කලාපයේ ආර්ථික වර්ධනය ඔරොත්තු දීමේ හැකියාවක් පෙන්වන නමුත්, පවතින ගැටුම්කාරී තත්ත්වයන් නිසා ආර්ථික වර්ධනයට සහය දීම සහ උද්ධමනය පාලනය කිරීම අතර සමබරතාවයක් පවත්වා ගැනීමට රජයන්ට දැඩි ප්රතිපත්තිමය වෙහෙසක් දැරීමට සිදුවන” බවයි.
මීට අමතරව ගෝලීය මූල්ය වෙළඳපොළ දැඩි වීම, ණය ගැනීමේ පිරිවැය සහ රාජ්ය අයවැය හිඟය පුළුල් වීම ද ආසියාවේ ආර්ථිකයට තවදුරටත් අවදානම් මතු කරයි.
